ياطود ..ياللي شويّ وتنتمي للعروش..!
ومعزّر الارض من حملك..وقلبك..خلي
.
.
ياللي السحايب على اضلاعك تحط وتنوش
من هيبتك مايبلغها المقام العلي
.
.
ماعمّرتك الخلايق بالجهد..والقروش
وخلقك فالاحداث يدعونه حدث مفصلي
.
.آمر على الارض لاجيتك وراسي يشوش
وآقول يالارض كانك قادرة ..زلزلي..!
.
.
حجاجك الصخر..عينك كهف..طلحك رموش
وكنهك بحور العجايب والخيال: الدلي..!
.
.
لو ماانت ذكرتني عبدالعزيز الرقوش
لما تواضع..وقام..ومد يمناه لي
.
.
ماكان لك فضل لو ضلعك يغل الوحوش
والانس ..والجن..فيمن راح واللي تلي
.
.
سلام تسليمة بالمسك والبردقوش
مع هبة من رياض الجنة المعتلي
.
.عليك يالاوجه الابلج يالخلوق البشوش
ياللي مصافحك بيرق عزّ..ماينجلي
.
.ذكرت بيتك وجدانك ودحر الجيوش
يوم انك اونست نار في يدي تصطلي
.
.واللي لفت في السروج وعودت فالنعوش
واللي لفت هيذبيّ وعودت..خيزلي
.
.ماخر طغيان طاغي..تحت كف ربوش
ولادمدم الظلم حلم العالم المخملي
.
. زمان وآنا ارقبك ياسيف يابو نقوش
واونس مهابة عمر واسمع بلاغة علي
.
.اسمك لو اني ذكرته في بلاد الحبوش
ابيض طين الوجوه السمر..باذن الولي
.
.
الله يثبث بمثلك عامرات العروش
والله يجمل بمدحي فيك مستقبلي
.
.وآنا اعرف انك لمحت بوجه سيفي خدوش
واعرف بأن..حاتم ازدي..ماهو بــ حايلي..
.
.
لعل رجال يمدحكم عشان القروش
مايفلح مع الرجال اهل المقام العلي..!