وين وصلنا

ايه ايه .. وصلنا لحجز السكن طبعا اللي يقول احجز من موقع بوكنق واللي

يقول لا ماينفع بوكنق المهم الاراء تعددت في كل مكان كل يدندن في الانترنت

على موال مصالحه ويحاول استدراج الزباين لموقعه واخوكم المجداف المسكين

مسوي فيها ابو الاذكياء اخيرا استقرينا وقررنا الحجز عن طريق احد مكاتب السفريات

في الرياض .

اتصلت فيهم وكلمني احد الشباب من بلاد الشام على مايبدو لأني اقول له السلام عليكم

ويقول لي اهلين انا اسلم وهو مايرد السلام ( قلت ياولد اكيد هذا من حقين حزب الله في لبنان )

ماعلي بشوف وش نهايتها معه واخر العلوم .

المهم حجزنا الفندق من عنده وكان 3 نجوم قلت له الفندق مافيه ازعاج قال ولو مافيه خيو

تعرفون انا مسافر مع العائله ويزيد يطلع الفندق الله بالخير ( اتورط وانا عصبي نفسي راس خشمي ومعاي العيال مشكله ..!!)

وانا شرحت لابو شكشك اننا محافظين ولنا خصوصيه ..قال ابو شكم ماتخاف , قلت يالله توكلت على الله

وحجزت واعطيته الفلوس كاملة (حولتها على حسابهم ) حقت خمسة ايام كاملة واخذت الاوراق وفاوتشر السكن

وذهبت للمنزل وقلنا للعائله توكلنا على الله بعد الفجر نمشي .

مشينا بعد الفجر ووصلنا ظهرا للحدود السعوديه الاماراتيه قلت للعيال قبل ماندخل الحدود خلونا نصرف دراهم

ونعبي السياره بنزين .

فللنا السياره وتوجهت الى بنك الراجحي الله يرحمه وسألت الموظف في البنك عن موضوع الصرافه

قال مافيه صرافه عندنا ,, طالعت فيه وقلت طيب هذا بنك .. ..؟

قال الموظف ايه , قلت ليش مافيه صرف ومكانكم على الحدود ومن الطبيعي فيه مسافرين يحتاجون

للتحويل سواء دراهم او ريالات وهذا من صميم تخصصكم وعملكم , قال الموظف روح اسأل الاداره ,

في الرياض , قلت له في المشمش والشرهه ماهي الا علي جيتكم اركض لكن ماتستاهلون والله الا (؟) .....

مشيت الى الحدود ودخلت مساري المخصص وكان مسار واحد اخضر وعشرين مسار احمر

والسيارات ورا بعض زهقانين وطفشانين ومرهقين نتحرى اصحاب السعاده يجمركونا ............. يتبع

سبحان الله ولا رد ولا تعليق

شكلي باقفل الموضوع

وانزل بدلا منه اراء ورجهات نظر حول رحلة المجداف الى دبي .

..... تم اغلاق الموضوع من قبلنا .