قبل وبعد الغياب كنت أفكر بالإياب لقلوبكم النقيه
متواضعة تسمو إلى شموخ ذوائقكم

البارحه والفكر ماخذله مع أحداثي سجال
مرات أشوف إنِّه علَّي ومره اشوفه معي

وأنا احسب الاحداث ما أخذها مع الفكر ارتجال
لو كان ماني المعي فالفكر مني المعي

يا اللي تركتي للخيال بصافي أحلامي مجال
من فكر من يغليك غيرالعشق وش تتوقعي

ما دمتي إنك في عيوني خير ربات الحجال
شعرٍ كتبته فيك فاصغي لا حديته واسمعي

لا مر ذكرك يا هوى بالي في أفكاري وجال
أشوف كنك ضبية باقصى خفوق ترتعي

الله على هالعشق كيف يقوض أوضاع الرجال
والله عليك بجاذبيه للقلوب تمتعي

العشق بذرة ود ما تلفي بنزوه واعتجال
وأنا زرعتك في فؤادي واحتميتك باضلعي

وانتي ملكتيني بلحظك لا نظر لي باختجال
هذا فؤادي فافعلي به ما تشائي واصنعي


تقبلوا صدق تحيتي
سعيد الغامدي