بعد تفكير عميق وطويل, قررت استبدال نظام الويندوز في جهازي من " ميلينيوم " الى " اكس بي " , كان قرارا جريئا بالنسبه لي " لاني سوداني ولا احب اغير وابدل كثير " , المهم , بعد اتخاذ القرار , استعدينا لساعة الصفر , وقمنا بتجهيز
جميع العده " اوامر الفورمات - سيديات الاكس بي وكذلك الاوفيس - طبعا كلها غير اصليه بل منسوخه والله يخلي ويديم لنا هنود عمارة الخليج بالخبر " وبعدين بدينا نتجمع واحد والثاني , واللي انا دعيتهم 2 " تعرفون لابد من القوات الخاصه وقوات الطواريء" , وبعد ما وصل صاحبنا الاخير بدينا في عمليةالفورمات ,
وخلصنا منها زي الحلاوه " ايه بس البلا كان جاي في الطريق " , وكانت الساعه الثامنه مساء , بعدين بدينا نشوف ونفتش عن كيفية استدعاء الويندوز الجديد , وعندها بنشرنا ,دورنا منا ومنا , جلس كل واحد يخترع اوامر من الطاسه , وبعد مرور ساعه تقريبا , فز خوينا وقال تذكرت كيف امر استدعاء الويندوز " شكلها كانت ضربة حظ " , بعد ذلك استطاع صاحبي من استدعاء الويندوز ..
"يعني لو انا مريحنا انفسنا من الاساس وسوينا تثبيت للويندوز عن طريق"step by step confirmaion" "والله مدري هي مكتوبه صح والا لا " راح يكون افضل واسرع , لكن كل دقه بتعليمه .
المهم بعد جهد جهيد , استطعنا تحميل وتثبيت الاكس بي , وقمنا نناقز من الفرحه , واللي يشوفنا يقول المنتخب فاز , وبعد الصجه والرجه , قمنا بتعريف الكروت , وشوي الا ونسمع طقة المودم
" والله اني حسيت ان ذيك الفرحه والمناقزه ما وراها الا المشاكل" , المهم سمعنا طقة المودم , قلنا بس , شكل المودم ودع , بعدها شغلنا الجهاز وحاولنا نعمل اتصال , لكن المودم صامت ولا ينطق برقم واحد , قلنا العيد وصل , يعني مافي امل اليوم نتصفح انترنت..

" فترة حزن وكأابه "

بعدها

قلنا ليه ما نروح نشيك على المودم عند واحد من هذولا الهنود اللي يسوون انفسهم مهندسين وهم اكبر نصابين "الا من رحم الله " , المهم رحنا لابو هنود وقلنا له المشكله وقال لنا : لازم يتغير المودم , قلنا نغيره , المهم اشترينا واحد جديد " موتورلا " ب 70 ريال , رحنا البيت وكانت الساعه تقريبا 10 ونص , المهم ركبنا المودم والا انه ابكم
مثل اخوه الاول ؟, قلنا يمكن هذه النوعيه من المودم ما تتوافق مع الاكس بي " نتفلسف على بعضنا " , المهم رحنا وبدلناه بواحد قيمته 150 ريال ونوعيته " ال جي LG " , المهم ورحنا البيت مره ثانيه " اللي يشووفنا يقول طاش ما طاش"
ورحنا وركبناه وسوينا اللي علينا , ولكن ,لا جديد , لحق اخوانه الباقيين " ليش هو احسن منهم " ورجعنا لابوهنود , وقال لنا فيه مودم امريكي اسمه " U.S.Robotics " من شاف الاسم وطوله مايقول هذا مودم , المهم
جلس الهندي يمدح في المودم هذا لدرجة اننا شكينا انه عميل لنفس شركة المودم "U.S.Robotics " , والله واشترينا هذا المودم بــ 190 ريال , وجيناكم طايرين على الشقه " لاحظوا اننا ثلاثتنا رايحين وجايين = معاناه " , المهم ركبنا اخونا المودم الامريكي
, وبسم الله الرحمن الرحيم , ما تسمع الا رنينه " مثل البرق " , ماشاء الله عليه , مودم على اسمه " امريكي" , المهم طالعنا في الساعه الا وهي 12 ونص تقريبا , قلنا نروح نتعشى ونرجع علشان نسوي اعدادات الاتصال بالانترنت , رحنا تعشينا وجيناكم مشوتين
وماوقفنا يكون الجهاز , وشغلناه وبدينا نسوي الاعدادت , شوي الا والكي بورد عيت تكتب حرف واحد , قلنا شكلها لازم اننا نعرفها على الجهاز , وقمنا بتعريفها واشتغلت , ولكن ازرار مربع الارقام والعمليات الحسابيه اللي على اليمين عيا يشتغل , وجلسنا ندور حل لمشكلة الازرزار وعدم عملها . وشوي
الا واحد من الاخوه سوى فيها فطين وقال : ترى نور زر "Num Lock "مقفل , قلنا اي والله انك ذيب , وجينا نشغلها وضغط خوينا على زر الــ" Num Lock " , الا والجهاز يقول مع السلامه , وينطفي فجاءه , لدرجة اننا قلنا "الجهاز هذا شكله فيه مس الجن وشكينا في الهندي اللي باع لنا سيديات الاكس بي "
المهم شغلنا الجهاز من جديد , وماصرنا نقدر نستخدم ازرار االارقام اللتي في الركن اليمين للكيبورد , وسوينا اعدادت الاتصال وشبكنا مع الانترنت , بس لا زلت اعاني من مشاكل كثيره , وهذه كانت مقدمة لهذه المشاكل اللتي واجهتنا , منها عدم عمل ازرار الارقام اللتي في الركن اليمين للكيبورد , وايضا الماسنجر يسبب قلق لي "لان الاكس بي يحتوي على ماسنجر جاهز "
, وايضا حاولت احمل برامج من سيديات عندي , تطلع لي رسائل بعد التحميل , بانه هذه البرامج لا تتوافق العمل مع احد الملفات الموجوده في ملفات win 32 , وايضا هنالك مشكلة تصغير النوافذ , ففي الملينيوم وال 98 تستطيع تصفير النافذه بضغطه زر واحده , اما هنا فيتطلب ذلك مشوار ؟؟ مدري هل توجد حلول لهذه المشاكل ياشباب !!؟؟

وانا لا أظلم الاكس بي , فهو بحق نظام ترفيهي متكاامل , والجرافيكس بصراحه شيء خيال وايضا التصاميم , وايضا اعجبتني طريقة البحث عن الملفات " كلام كثير " والكلام يطول في تعداد مميزاته وخصائصه..

لكن ودي لمن عندهم الخبره بالاكس بي انهم يوافونا بالحلول لهذه المشاكل .


أسف على الاطاله

اخوكم الملكي