Tweet
شعر راسي حطب والشيب نار(ن)تشبه==كيف يطفا لهيبه والزمـن لـه وقـود
من يهدد حياتي كيـف قلبـي يحبـه==شب خضر المشاعر واحترق كل عود
حسبـه الله لاولّـع شـراره وقـبـه==واصبحت تحت نيرانه حياتـي ركـود
صار عمري جمر يصلى وقلبي مكبـه==والجوارح على ماقد حصل لي شهـود
امتلا شعر راسي من بياضـه وعبـه==حل قـدام حينـه وكلمـا لـه يـزود
فيـن ودك تـروح وفيـن ودك تخبـه==عن قدومه وليتك باالتقى لـه تجـود
راس مرقاب طارف للعواصف مهبـه==ماتطفيه نسمـات الهـوى والبـرود
مابيلحقـه منّـا الا الجفـا والمسبـه==ولابتشري علاماته صـروف النقـود
هو نذير القلوب وهو عـدو المحبـه==وهو الطريق المودي للقبـر واللحـود
وهو على كل غافل عن مصيره منبـه==وهو قرين المساجد والدعاء والسجود
يوم يدعيـك صوتـه مالـك الا تلبـه==والسنين التي تطـرد بعضهـا تهـود
ما للانسان حيله لانـزل حكـم ربـه==والقدر له على كـل الخلايـق نفـود
مايـرده مـرد ولا يـداويـه طـبـه==ولانكـره النكيـر ولاجحـده الجحـود
يمكن انـه يتـوّه كـل عاقـل بلبـه==وشبعـد للمسيـر لاوصـل للـحـدود
كاس محتوم شربه له قلوب(ن)مغبـه==لاوعـد مايسعـه الا يوفـي الوعـود
تعليق