بعض القصايد كثيرة في كثير الرجال=وبعض القصايد قليلة في القليل القليل

احيان تخطي وتمدح ناس مدحك ضلال =واحيان لومامدحت انسان تطلع بخيل

ياواحد كم لي ابغى اخبره ماجا مجال=ولاودي يكون تحضيري وعرضي هزيل

لكن واللي خلق للارض هذي الجبال=ان الرواسي لمقداره هي اصغر مثيل

ماهو عشانه ولد عمي لكن الخصال=اكبر من الجهل في عين الذكي والهبيل

اول شي البيت طيب والعروق الهزال=مجار ماتنهزه ..والا لعرقه تميل

العرق كلّه منقّى من كرام السبال=والبيت ماقد نشا به لاشحيح اوذليل

معمور بالطيب مااقصد لاجنيه وريال=الطيب ...لوهو على فاقه هو اكبر حصيل

بر بشيبانه وباهله على كل حال=مبرّة ابو العرب في حق ابوه الخليل

محنك لو يصافحه الردي بالشمال=يردّ نفسه عن العيلة ويقدر يعيل

لو اتزانه يدرس في فنون القتال=مانشبت حروب ولعتها بقال وقيل

مايكرم اهل الجنوب ويحرم اهل الشمال=تعامله ذوق واخلاق وذراعه طويل

ابعد عن النقص واقرب من حدود الكمال=قرب الممات المحتّم من حدود الصقيل

وافي ...تشوفه تشوف ان الوفا مايزال=جميل الاخلاق والخلقة وراعي جميل

يااحمد يابن سالم اسمائك عظام وجزال=احمد ووافي وزايد فوق ذلك نبيل

يفداك من يحسب انه مع شويّة عيال=يدهر شدا يحسب انه من مكانه يحيل

صحيح ماعمر فتنة تبتدعها الطوال=لكنها في القصير اللي مسوي طويل

ابدا ولاهي فعال الراكدين الثقال=لكن خفيّف وموهم نفسه انه ثقيل

رسايله ماتصل من نقص صدق المقال=وفأحسن احوالها تركن في الجنك ميل

اللي جمايلك تصفع وجنته بالنعال=يغدرك وانته تضله تحت ضل ضليل

صحيح لو تعطي العامل جزيل النوال=يالعامل الا يعذرب في صفات الكفيل

ويفداك رجال تكرمه وتزيده دلال=وايه رياح تجي ضدك معاها مميل

ويفداك شلة صدق فيهم مسمّى قلال=قلاك شيمة, أدب ..والصدق منهم قتيل

بعهد جدانهم عاشوا على الانحلال=والعهر فيهم ماهو طاري ولكن أصيل

تجمعوا ينبحون وقافلتنا جمال=وتفرقوا مثل رمل بانتفاض الشليل

واللي مسالم وفي جوفه يحد النصال=حمل لوا الانشقاق ووهق اغبى فصيل





وهذي مباراة سوا الصبر فيها اعتزال=من يوم شاف السنافر حالفوا شرشبيل

العام الاول موردها الشرك والحبال=والحين تبغى تشب النار راس الفتيل

واللي يفكر يطول اشياء ماهي تطال=يهدي ف الاول عصى موسى لبابا نويل


ويفداك من حالته ظهور دون اتصال=كنه على هم ذا العالم أمين وكيل


شاعر يعاني من الغربة ومالانعزال=مايوم نافق ولاداهن ولااصبح عميل


يقدر على البدع والتآلبف والارتجال=له يعترف عايض القرني وناصر هطيل

حلمه كبير وبعيد وصعب صعب المنال=المجد والشهرة بعينه مرام ضئيل

ظهورنجمه معيقته الحروب السجال=واهل الصحافة تشوه صورته بالمزيل


قيمته في الشعر تشبه قيمة ابو طلال=فقلوبنا اللي تثمّن كل شهم رجيل


منحوس مايوم حصل في حياته منال=مفروض يلعب اساسي والأساسي بديل

اجمل قدر في حياته خطوة الانتقال=مقرّفيه انت (هد) وابو سعيد الوكيل


مثلك ترا ان القصايد نفسها به تقال=والله ماقولها لومانت عندي جليل

سم ون دفرنت ...في عيني ماهو نورمال=الشاهد الله نحوك هاو ماي هارت فيييل

لوكان مثلك يدير البرشا والا الريال=وجاهتك تسعد انصاره وتشفي الغليل

كتبت لك والكتابة في فضاك ارتحال=ولااكتب لك اشياء ماعندي عليها دليل

قصيدة تسلم الاسفاف والابتذال=سلامة المجد من وسم الردي والحليل

ماهي مجرد يلا لا لال يالا للال=لكنها ابرّ حلية في النهار الفضيل

وانا اقدر ابدع لك اشيا ماسبقها مثال=لكن تركي لبعض الهرج صبر جميل



والّا على الصدر تتزاحم بنات الخيال=تزاحم السفن في البسفور والدردنيل

يوم ان شرق القنال يضد غرب القنال= واعلن حمام السلام اشد واطول رحيل

هي المعاني التي في لحظة الانثيال=ضللتها في ضلوع الصدر مثل الدخيل

طالت وانا مبتكر سياسة الاختزال=لكن طول النخيل اللي يبز النخيل

فلاتحسب الشعر يكفي فيك يابان الحلال=ترا وصولي لمكنون الخفا يستحيل

والمدرك ان اللغة وسيلة الإتّصال=يدرك بان اللغة في الصدر عابر سبيل

فليعلم الجمع بأنك مكسب وراس مال=من وجهة انك صديق ووجهة انك زميل

هذا وانا اقول يالله لاتغيّر بحال=تبقى النجوم الزواهر في رياسة سهيل

لأنه لو يروسني غيرك ...كبير احتمال=يخذلني الصبر واعصي الدولة والا استقيل