جاز لي الجزل والزاجل سجى واستباح= جز روحي وسجاها ولي جيز بوح
بابدع الهيض وارجي الله بدرب الصلاح=وادري ان المقدر قد كتب لي بلوح
لاتلومون عقلي لو فقدته وراح = من تصاريف وقتي ماتطيب الجروح
انظم القافيه للجد والا المزاح = لو تبون الحقيقه مال بحري نزوح
جازت الجازميه من مزاجي نزاح = زوج مرجان زنجيه وجيزي رجوح
اشرب الصافيه ماحب غير القراح = يوم غيري على بير الجماعه يروح
صافي الصنف ماغنته لِله صباح =من مصافيه صفيته بصيني صبوح
وارث الشعر من شيخٌ نهار الصباح=ماتنازل عن الطولات وجهٍ صبوح
من حداه العدو تمطر عليه الرماح= والمزرفل ينوض وكل خيلٌ جموح
يوم راشد نخى زهران والمرت صاح=رهوة البر تشهد فوق ذيك السفوح
سلسبيله سلى بالي وسال السماح= ان تسامى سرى وان سام سِله يلوح
خل ذا اليوم لو تنفث عقدها سجاح=يبطل الكيد وان حطوا له ابليس فوح
نحمد الله عم الامن كل البطاح= تحت حكم السعوديه والاسلام روح
ياولد كيف صار النت ساحة كفاح= كل ريحه على الكيبورد جتنا تفوح
بعظها زلّ مادارت عليه القداح = وازدواجية المعيار في كل دوح
خايف الصبر ينفذ لو طغى الانفتاح=راعي العيس مايدري بما في الصروح
ياوجودي وجود الي تردى وطاح=ياتجرع من اللوعات مر الطموح
او وجود الذي فارق دياره وناح= هلّ دمعه على الخدين وقت النضوح
خافقي شيّبه واشقاه كيد الملاح = يشعل النار والفتنه وكله جنوح
بين سيل المشاعر وش يسوي فلاح= كل ماقال كلمه طالبوه الوضوح
ان حكينا مصيبه وان سكتنا جراح = خير الامرين مُرّ وتاليتها قروح
جزت عن زج جزلي في مزج الرياح=من مزاجي سجيته وانبرى لي ينوح
سقت جزله يحييكم بنسمة صباح = تنعش الروح جاز الجزل فيها وبوح