لاهني للي تخرّج ما البنات معلمه=دام أبوها حي ما لها منه فكه للممات
غرها المسكينة المستقبل اللي تحلمه=والطموح اقفى بها يا مصدق طموح البنات
ما نفعها دفتر التحضير وإلا المر سمه=والسنين الماضية ذكرى السنين المقبلات
حلمها وش حلمها ؟؟حلم الفتاه المسلمة=غير مايدري به اللي طول عمره في سبات
يبغيها طول العمرتصرف عليه وتخدمه=ولا يهمه عايشه في دحر وإلا في هنات
كل ما جت تقترب منه استحت ما تكلمه=والخفر والخوف يسكنها ويقتلها السكات
وفي عشيّه قبّلت راسه وهي متبسمه=قال لها وش سر هالقبله.. وقالت لك غلاة
يا بوي اسمعني تراني حيل بك متعشمة=قال لها قولي اخلصي من غير شرح مقدمات
قالت له تدري إني منَ ابسط حقوقي مُحْرَمه=بس انا لرضى عيونك كم تحملت العناة
تدري يابوي إن ماني في حياتي مغرمه=كثر ماني مغرمه بالصوم وإلا بالصلاة
مير ترضى لي حيات الذل بعد المكرمة=وإلا ترضى لي العنا يا اعز ما املك في الحياة
قال لها إن كان الزواج بعيد مثلك يحلمه=قالت له ويش السبب قال السبب عنه الغنات
جلست تصفق بكفٍ كف وهي متندمة=تندب الحظ الشقي مرات وتهل عبرات
قالت يالله مثل ما احرمني السعادة تحرمه=من جنان الخلد إذا ولت حياته للممات
خافوا يا أصحاب البنات الله خفاكم يعلمه=واتقوا يوماً من أهواله تذوب الراسيات
اطلبوه العفو والرحمة وحسن الخاتمة=واعلموا لأولادكم فيكم أمانه وأمنيات