عوض الله غوينم المطيري
هذه القصيدة لها أكثر من ثلاثين عام لعلها تناسبكم
وسامحونا
يا شاب ياللي ساع ما خط شاربك – وثوبك نظيف ولانت رابط زراره
ياللي معك موتر جديد ومعجبك ــ معجب بتفحيطه وكثرة غـباره
وإن صفر الشكمان تضحك ويطربك ــ والصرف في البنزين زايد عياره
لعبت في موترك محدٍ بغاصبك ــ من قوٌّ جورك صار يقدح شراره
خطرٍ عليك بجنب كبري ينشِّبك ــ وإلا نتيجتك الندم والمراره
وإلا تجي لك مع ملفٍ ويقلبك ــ وأنته مع المقسوم سواق طاره
الظاهر أن أبوك ماهر مؤدبك ــولا عطاك درس في الحياه ولوقاره
خلاك دوم تجرّ حبلك بغاربك ــ وتمارس التفحيط في كل حارة
يوزك الشيطان وإبليس مزلبك ــ مرّ يمين الخط ومرّ يساره
اللي وراك أوذيت واللي بجانبك ــ تقطع نظام السير واى الاشاره
ليت المرور يشوف فعلك ويقبضك ــ اسبوع بالتوقيف دونك خفاره
حتى يجي والدك للسجن يطلبك ــ ويغرمونه دفع مبلغ خسارة
وأمك مع الشباك تنظر وترقبك ــ في كل يوم تروح يمك زيارة
وعشرين سوط تذوقها في جوانبك ــ بأمر من الأمير يصدر قراره
ولعل أبوك يضيق خلقه ويضربك ــ عقب الغرامة والتعب والدوارة
حتى تعوّد للركاد ه وتعجبك ــ وتكب شغل الشيطنه والشطارة
وتجد في درسك وتفهم بواجبك ــ وتصبح مهندس أو موظف وزارة
وأمك تسولف بك وتفخر بمنصبك ــ وأبوك مع ذكرك يزيد افتخاره
وكل الشباب اللي من أول مصاحبك ــ يحذون حذوك في العمل والجدارة
وكل والد بنت وده يناسبك ــ يعرض عليك اللي يخضب جماره
ويصبح ضميرك حي حتى يؤنبك ــ وتندم على فعل الجهل والدشارة