تذكرت لكم قصة لواحدن من عندنا من القرية يوم كنا ندرس في الابتدائية

ذا الولد كان اطخم بقوة إلى الآن وأنا مانسيت شكلة

رغم انه كبر وتغير وطلع له دقن إلا انه ماينسي

حتى المدرسين كانوا مغرّزين عنده

اذكر مرة مدرس القراءة ونحن نقرا وكانت ماصة الطالب وسط الفصل

و وصل عنده الدور في القراءة وجاء المدرس يبغي يصحح له الخطأ

وقعد فوق ماصته وانتقل الدور عند طالب ثاني والمدرس بعد ماقام من فوق الماصة ماصدق انه يقعد بجنبه حتى المدرس نقد على نفسه بعدين


هذا الطالب بلاه الله بالجمال الفاحش.. زي البفت ياإخوان

أحياناً المراية مآ تقدر تقآومه حتى يوم يامح فيهآ ... هاااه ؟!!

المرآيه تذووب من الزين يا الربع... شي عجيب لحم وجسم كل شي

حتى أبوه وأمه يداوسون عليه

أبوه يقول : أعرق لنا ==< والله لاتشوفون ابوه تقول ماخلق إلا مع القرود

وأمه تقول : والله انه خلقت خاله فلان == < ماخس من قديد إلا عسفان

رغم هذا الجمال والطخامة إلا أن الولد يحمل صفة أخرى متمكنه منه تمكن الجمال

هذه الصفة تزيدة جمالا ومحبة عظيمة في قلوب المقربين منه

هذه الصفة هي الدلاخة .!! هاااااه

لا ماهب الدلاخة قصدي ( اللقافة ) كان ملقوف بشكل غير طبيعي

أو انه دلع والله ما ادري يمكن دلع لان أبوه وأمه كانوا يحبونه ومهما سوى ما يخبطونه

ماهب زي بابا وماما أحيننا مانرقد في البيت وإلا نرقد فوق السطح على حسب الظروف

وإلا ما نتعشى وإلا نرقد من كثرة الخبط وشدة البكاء

خلنا في الولد الاطخم وريحنا من طفولتك الله يقطعها

ايوه الرجال ذاك اليوم راح سد ( خلف ) المدرسة وخذ له طباشير

وقعد يكتب عن نفسه كلام غريب كتب أشياء عن نفسه لو أقول لكم ماتصدقون
مضمون الكلام يقول ( ***** والله مدري وش اكتب لكن توقعوا أي كلام شاذ وأكيد انه صح مهما ذهب خيالك في الشذوذ فهو صح )
بعد ما كمل الولد الكتابة افلح عند المدير يبكي



وقال له : يس يس يستااااد الط الط الطلاااب يك يك يكتبوون عني كلام وص وص وصاااااخة ؟؟!!!



راح المدير ومعه مجموعة من المدرسين المهابيل سد ( خلف ) المدرسة

شافوا الكتابة

ورجعوا ساكتين تساورهم الشكوك ههههه وشرايكم في اللغة منتازة بذات تساورهم

تحولت المدرسة إلى مركز للأدلة الجنائية والبحث والتحري

وتحول المدرسين الى المحقق كونن ههههه

تعرفه ؟
منهوه ؟
فيمن تشك ؟
هل لك عداوة مع احد ؟
متى شفتاها ؟
من كان سد المدرسة؟
من اللي عندهم حصة رياضة ؟
لا –مدري- لا- مدري – لا- مدري!! ( هذي إجابات الطالب)

بعدين جايوا المدرسين في الفصول

من طلع اليوم يطير الشراب؟ هاااه؟!

( طبعا المدرسة ما كان فيها حمامات إلا حمام واحد فوق المدرسة للمدرسين واللي يبغي يطير الشراب من الطلاب يغدي سد المدرسة)

طيب هات دفاتر التاريخ – مدري ليش دفاتر التاريخ بالضبط-

علشان يقارنونها بالكتابة

اللي يعترف مانخبطه

بس يغدي يمسح اللي كتبه هذا المنظر مايليق بالمدرسة

ولا نعلم باسمه المهم انه يعتذر من زميله

نحن جينا نتعلم وكل واحد يخطي المهم انه يكون شجاع ورجال ويطلع

بعد ما شافوا أن الطلاب يا لله لك الحمد

قالوا: طيب كل طالب يطلع ورقة يكتب فيها اسم الطالب اللي كتب
واللي ما يعرفه يسلم الورقة فاضيه أهم شي انه ما يكذب

( استلم المدرس الأوراق فاضية كلها ، اذكره الين ذاحين مدرس القرآن مطوع الله يستر عليه كان وجهه احمر من المصيبة )

شاف الأوراق كلها فاضية

وقال: اسم الطالب تكرر في جميع الأوراق ونحن عرفناه فقبل ما نطلعه نبغيه يكون شجاع و يطلع من نفسه هاااه..!! ابيطلع وإلا نطلعه

والطلاب يتلفتون ينتظرون متى يطلع لكن مافي فايدة

وعلى هذي الحالة في جميع الفصول

جميع الحيل والأساليب بآت بالفشل الكلوي ههههه

والطالب الملعون ماهلا يبكي ويفرّك عيونه

وبعد الصلاة جاء المدير

وقال : الطالب اللي يعترف والله لا عطيه جايزة

و اخترج مية ريال من جوف جيبه

وقال : اللي يبغيها يعترف واقسم بالله ما اخبطه بس يعترف وإلا يعلم باللي كتبها
اتظرنا حد يطلع من الطلاب ابا حد يطلع ونحن نتلفت يمين ويسار

بعد ذلك جاء المدير بالعصاة خيزرانه واخبط يامن يخبط

كل الطلاب في المدرسة انخبطوا ذاك اليوم مابقي ولا طالب

إلا طالبن واحد ماحد شك فيه ولا حد لمح في دفترة ولا حد خبطة

اهوه الطالب الاطخم مع انه اهوه اللي كتب





بعدين اهوه علمنيه بالسالفة وقال : احلف انك ما تعلم حد

وحلفت إني ما اعلم حد