يانار والشوق يحرق مهجتي حرقا = بي مثل مابك ولابك مثل مابيه
مابين ناري وبينك واضح الفرقا = تموت نارك وناري بالحشا حيه
الما يطفي لهيبك يغرقه غرقا = وبارد الما يزود كيتي كيه
يطري لي اللي سقاني ليلة الفرقا = من دمع عينه غلا ودٍ وحنيه
جاني يقول السفر لاقامت الورقا = تجر صوت الحزن من بكره فجريه
في حينها الريق في حلقي وقف شرقا = عجزت لاانطق ولا اجاوب مناجيه
جاوبه دمع عقب فرقاه مايرقا = مجراه محفور عالخدين ماريه
روح بروحي معه واستلها عرقا = وشلون تبرد سعيري بعده الميه
غزيل أغيد سكن من حينا شرقا = الشمس ما تشرق إلا لانتشر ضيه
أبو عيون طرق قلبي بها طرقا = أدعج والأهداب ظلٍ بارد وفيه
أنا اشهد انه سرق عقلي معه سرقا = واصبحت بعده جسد والحال مبريه
ماغير اقلب عيوني في السما الزرقا = من شافني قال متلبس بجنيه
جابوا لي الشيخ يقرا قال كيف ارقا = ودي ولكن علاجه ماهو بايديه
السحر مايبطل الا نحرقه حرقا = وسحر مجنونكم في عين حوريه