بسم الله الرحمن الرحيم
والسلام عليكم ورحمة الله تعالى وبركاته ...

المرور وما أدراك مالمرور ... قطاع الطريق الجدد ... موظفو جباية الأموال (( لا تلوموني ))
لأول مره أرى نقطتي تفتيش على طريق واحد لا يفصل بينهما سوى إثنين أو ثلاثة كيلو متر ..
نقطة التفتيش الأولى ( عشوائيه ) على المزاج ربع يوم أو نصفه تجدها وعدة أيام لا تراها ..
والنقطة الثانية نقطة مركزية على أبواب مدينتنا الغراء لا يهزها الريح ولا تتحرك ليل نهار ..
النقطتين ... أكتويت بنيران مدفعيتها ( المخالفات ) ..

وبما أني من مستخدمي الطريق ليل نهار وفي بعض الأحيان لمرتين يومياً .. فأكون زبون دائم ..
لدرجة بأنه في بعض المرات أُخير بين المخالفات .. (( تبيها تظليل ولا سرعه ))
هذه الأيام ... أخير بين ( تظليل , سرعه , عدم حمل رخصه ) ... وأختار أرخصها ..
ووصلني بأن أسعار المخالفات عُمل لها تخفيضات ... ولله الحمد مما جعلني أفرح ..
لأتصل على رقم المخالفات بالرياض لأجد المبلغ أقل من سابقه ( الأشهر الماضيه )

لأول مره أخاف من مخالفات حينما :
(( كنت متوقف وقوف غير نظامي + تظليل + عدم حمل رخصه + عدم ربط حزام الأمان ))
نظر إلي رجل المرور ... وولى ... " شكلي كسرت خاطره "


* عدم حملي للرخصه .. لأني .. فقدتها منذ حوالي شهر ..
وعند مراجعتي للمرور بعد أيام من البحث والتحري في جميع أركان المنزل وداخل الأدراج وخلف الأرفف حتى تحت بعض الفرش لعل وعسى أجدها وأرتاح من هم تستيد المخالفات وهم الإعلان وهم دفع مبلغ تجديد رخصه بدل فاقد والهم الاكبر هم دفع مبلغ مالي نظير التأمين ( الفاشل ) .

المهم
توجهت بعد أن فقدت الأمل في إيجاد الرخصه .. إلى المرور بعد حوالي أسبوع ... لإستخراج بدل فاقد .. وبعد السؤال عن الإجراءات تم توجيهي إلى أحد الموظفين في المرور ...


أبو عابد : السلام عليكم ..
العسكري : وعليكم السلام ..
أبو عابد : ( نافخ صدره ) ضيعت الرخصه وبغيت بدل فاقد ..
العسكري : سويت إعلان ؟
أبو عابد : لا .
العسكري : سو إعلان .. وجب صورة من بطاقة الأحوال وصورتين شخصيه وصفحة الإعلان وصورة من التأمين على الرخصه .
أبو عابد : ( الحمد له ما فيه ملف أخضر علاق ) طيب ليه الإعلان ؟
العسكري : لازم
أبو عابد : طيب هذا انا اعلن عندكم .. لازم اعلم خلق الله إني مضيعها !
العسكري : هذي إجراءات حن نحنفظ فيها بالسجلات .
أبو عابد : طيب الرخصه ومكتوب فيها رقم تلفوني .. اللي بيحصلها بيتصل لو له نيه يرجعها ..!

شفت إني مصختها معه .. وبحكم إن عندنا أخلاق ما شاء الله تجاريه 100% ...

أبو عابد : طيب وين أسوي إعلان ؟!
العسكري : مدري ... لكن شف المكتبة الفلانية .
أبو عابد : طيب ما أقدر أخذ ورقة منكم تثبت إني مظيع رخصتي .. أرحموني من تفتيشاتكم في المدخل ..
العسكري : ما نعطيك شي ..(( ما بقى إلا يقوم يطقني )) .. شف الملازم ..
أبو عابد : وين مكتبه (( أصلن كلها مكتبين .. واحد حاشرين فيه ملازمين والثاني لمدير المرور ))
العسكري : في الغرفة اللي قدامك على اليسار ..
أبو عابد : يعطيك العافيه ( بدون نفس ) .


إتجهنا وأمرنا لله إلى الملازم ( الضبوطه ) نسبة لصغره في السن ..

أبو عابد : السلام عليكم . (( توني دخلت عليه وبيطلع من المكتب ))
الملازم : وعليكم السلام ورحمه الله .
أبو عابد : مضيع الرخصه وباقي ما انهيت إلإجراءات .. وانا كل يوم نازل طالع للدمام مره ومرتين .. ما فيه ورقة ترحمني من التفتيشات اللي بالخط .!
الملازم : ما نعطي أوراق لأحد .. خلص إجراءاتك وتعال نعطيك أورقه .
أبو عابد : بيني وبين نفسي بدت أسلاك المخ تتحرك وتفسر كلامه ... أخلص الإجرائات ويعطيني أورقه .!!
لما أخلص الإجراءات أباخذ .. الرخصه .. ما عاد أبي ورقته ..
أرجع وأقوله بعد ما أستنتجت الإستنتاج الخطير أخر كلام .؟
الملازم : أخر كلام .
أبو عابد : سلالالالالالام .


بعدها طلعت أجر خيبتي ... الناس خيبتها السبت والحد وانا خيبتي ....." اكمل الفراغ " ..
وانا طالع وإذا بسياره صغيره لشركة تأمين ..

السلام عليكم ... على كم التأمين ( حراج )
موظف التأمين .. أي عمر ..؟
أبو عابد : فوق واحد وعشرين ...
موظف التأمين عطاني مبلغ فوق 600 ريال .. وليتها شركة تسوى أول مره أسمع فيها ..!
المهم بيني وبين نفسي الخايبه ..
خايف أخذ لي تأمين فيها .. بعد بكره تقفل .. ويصير شي لا سمح الله ... وتكون غير موجوده في الخدمه
وأرجع أأمن من جديد .. وكنك يا أبو زيد ما غزيت ..!؟

أبو عابد : مع السلامه .رحت للمكتبة اللي قال عنها العسكري .. ما عندها إعلانات أصلن ..
ولفيت جميع المكتبات حتى المطابع لعل وعسى ومكاتب العقار .. ما حد حولك ما فيه إعلانات ..

أرجع للمرور ( ماهي حلوه )
أروح الدمام أسوي إعلان .. برضوه مو حلوه .. فيه ناس ما بترحمش على المدخل ^_^.


لما لفيت لين طفشت ... قلت ما أحلى عيشة الصعاليك .. بلا رخصه بلا هم .
وكل فتره أخذ لي قسيمة أبرد فيها ظهري .. عدم حمل رخصه أو تظليل .. متخصص الأن ..


صباح أمس : فيما أن انتظر الورقة الصفراء ( إشعار المخالفه ) ومع وجود زحمه مخالفين ... مجتمعين حول كاتب المخالفات ..رجل المرور في التفتيش .. شاف سياره مقتربه وفيها ( عسكري ) ولكن ليس بأي عسكري .. بل مقدم .. لكن ما أدري في أي قطاع صراحه .. ينادي في زميله في المسار الأخر ( شوف المقدم مو رابط الحزام ) .. وقفه على جنب .. وإذا بهم يتضاحكون .. وانا أغلي من القهر ..وصل المقدم الهُمام .. إلى رجل المرور ... ورجل المرور بكل بروده وبأجمل إبتسامه ( ما عمري شفتها ) تفضل ..!؟
انا هنا .. ما بقى كلمه ما قلتها بيني وبين نفسي"طبعاً " .. ناس وناس ... والله لنا ..


وانا واقف أخذ مخالفتي الكريمه ... مقيم من جنسية عربيه شائق في شركة مقاولات مخالفته ... تحميل عمال المؤسسه في ( حوض ) الدينا ..والمقيم بين نارين ... نار المخالفات من جهه .. ونار صاحب المؤسسه اللي ما يتسماش من جهه أخرى .. وين حقوق الإنسان عن هالعمال اللي أحرقتهم الشمس في حوض الدينا ... وإذا هانت وما فيش دينا .. ميني باص ينحشرون فيه حشر !


أخذت مخالفتي .. وأتجهت إلى البيت .. وانا في الطريق جالس أحسب كم مخالفه أخذتها هالشهر ..!

* * * * * * * * * *

خلوني ألخص ما جرى أعلاه ..



* إجراءات إداريه بيروقراطيه مالها أي داعي .( الإعلان ) ..
* شركات تأمين لا تستمر في السوق .. مجرد سرقة لأموال المؤمنين لديها .
* عدوم وجود جهة رقابية على هذه الشركات وإعادة الحقوق للمؤمنين .
* مخالفات مروريه على الجميع بإستثناء ( بعض الناس ) .
* نقاط تفتيش عشوائيه ( والله أعلم ) .
* إركاب بعض المؤسسات لعمالها بطريقة مهينة في سيارات النقل .


وفي النهاية لا حد يقول سويت الرخصه ... بكل تأكيد لا .

وتقبلو تحيتي وتقديري لكم

عبدالله