ياحروفي مع نظم القوافي تعالي واسعفيني=وانحني في كتابي لاتخافين من راس القلم
اعرفك وافية لاصحت في ساعة الحاجة تجيني=ودي اكتبك هالمرة وحبري بدال الدمع دم
ان قدرت اكتبك يامرحبا وان تعثرت اكتبيني=لاتخليني احلف مااكتب الشعر وآبر القسم
مثلما كنتي اول في بحور المحبة تغرقيني= ليتك اليوم تدرين ان قلبي تفطر وانقسم
وانها حرمت من لذة النوم والغفوات عيني=واني امسيت واحزاني وغيضي تفيض وتحتدم
وش يقول الزمن عني وكيف اقدر اواجه سنيني=مالي العذرفيما صار حتى لو ابديت الندم
كنت طفلٍ صغير اهتز واحبي على راحة يديني=علموني(الله اكبر،الله اكبر، ومن يسلم سلم )
علموني احضن المصحف وابوسه واعطر به جبيني=وامسحه في خدودي وارفعه في مكانُ محترم
قالوا هذا كلام الله هذا هو الحق المبينٍ= نورنا درعنا دستورنا شرعنا عز الأمم
صرت احبه واحسه قطعةِ غالية مني وفيني=وانزرع في دمي عشقه ومنه نبت حتى اللحــــم
أحكمي ياحروفي وانصفي نورعيني وانصفيني= علميني من المظلوم فينا ومين اللي ظــــلم
مصحفي ذاك ضميته بصدري وشلته في يميني= مصحفي ذاك ماشاله عمر لين كبر واستحم
مصحفي شفته البارح بصوت المنادي ينتخيني= رافع الصوت يصرخ وينكم وينكم يااهل الشيم
طحت في كف كافر دنست راحته طهري وزيني= دنست راحته سورة محمد وعم والقلــــــــم
انصروني في الدنيا من الكافر اللي مـــــايبيني= الا ان كان انكم راضين ؟ صيحوا بلا والا نعم
من نصرني في الدنيا فهذا عهد بينه وبيني = ادخله جنة الله وابعده من عذاب المنتقم