Tweet
ياشعري اركد لا بعثك الله من قاع السكون = ماابيك لاعد تمتحني ضاق بك صدري الحزين
وش هو له اضوي لك قناديلي واوسدك الجفون= وانته تشابه لاصدقاي الحاضرين الغايبين
واسقيتك الماي الفرات العذب من نبع العيون = وانته تذر الملح في عيني على مر السنين
وش هو له اسامرك ماسريتني قل من تكون = ماشفت منك الا الجفا كم فز لك جرحي الدفين
من اول افخربك واقول اما كون اولا اكون = واليوم ماعد لك هوى خلك في اعماقي رهين
كنت اتحرى فزعتك كنت اترجى منك عون = خيبت ظني فيك يوم اني ذخرتك لي معين
ماتدري انه ضاق بي الحال في عصر الركون = مسكين ماخلوا لي التجار ذره من طحين
مالك ومالي يومك تربصت بي ريب المنون = مالي ومالك يوم انا تربصت بك صيد(ن) سمين
بحبسك لو تشفع لك الدنيا عفاريت وسكون = ناوي اهينك مثلما صيرتني صفر اليدين
بصبر وبتحمل ولو هدتني حمول الديون = مابه عني الا الغني الله والداين مدين
وانت اترك المغبون ياشعري يلحفه السكون = لاتستفزه ثورة البركان من صدري الحزين