حاولت أدور للخطا عندك أسباب
حاولت أشوف بعين ماهيب عيني
حاولت ألاقي لك عذر يقبل عتاب
حاولت اضمك عمر تالي سنيني
حسبت لظروف الزمن عندي حساب
الا أنت ما ظنيت ظلمك يجيني
ظلمتني ظلم الموالين الاقراب
ياكيف تقهر من بذاتك سجيني
جفيتني لين الجفا خاطره طاب
منك الجفا جاني يقبل جبيني
هجرتني ذنب عن المغفره غاب
وجيتك غفور لكل ذنب مبيني
عطيتك اللي زاهد فيه وهاب
لا ما تكاثرت العطا في يديني
وسلمتك المركب ولافيه ركاب
غير الذي زانك علي راحتيني
واليوم مدري كيف ظني بعد خاب
وانا أعرف أن الحر وعده ثميني
اليوم هو اليوم تقتص الاعطاب
والله لاحني بنزف دمك يميني
والله لاخلي دمعتك نور الأهداب
وابكي معك وابكيك وانسي حنيني
واعلمك ان الهوى فيك كذاب
وارجع واقول ان الهوى مبتليني
واطمنك بالحب.. وافز مرتاب
واقول بعد الحب..لا تحتريني
بالعب علي قلب لعب فيه نهاب
واترك خيال الشوق بينه وبيني
تعال وخذني لا تعذر بالأسباب
الوقت هو الوقت بعبر سنيني