ياحبيبي والطريق اللي طويته لجل عينك * اشهد انه هد حيلي حيل لين انه طواني
والبلا ماهوب طول الدرب لكن انت وينك * بانتظارك ياما عديت الدقايق والثواني
لو لقيت بآخر المشوار من عطفك ولينك * ماينسيني التعب ما قلت لك إني أعاني
التعب راحة على ماقيل لاجا من ضنينك * بس عاد السالفة لاطولت قالوا أناني
وانت ماعادك مثل ماكنت في ماضي سنينك* كنت تسبقني على الميعاد في ذاك الزمان
كنت تاتيني بحر الهاجرة ترخي بيدينك * ليل شاتي بسمتك برقه وتمطرني حنانِ
كنت تاتيني مسا والنور يشرق من جبينـك * كنت اقلك ياصباح الخير لااضويت المكانِ
كنت تاتينـي وتتحفني برمانـك وتينـك * والقطوف اصناف في روضك جنى الجنات دانِ
في صباحات الندى وردك يضاحك ياسمينك * وفي مساءات اللقا ليلك أغاريـد وأغانـي
كنت اظن الورد يذبل قبل اشاهد وردتينك * واقتنعت ان الذبول اوهام في عرف الحسانِ
كنت تاتيني هدية عاشق براحة يمينك * طوق فل تغار من عطره زهور البيلسانِ
كنت تاتيني مشاعر شاعراشعلها حنينك * كنت ارتبها قصيدة تدهش ارباب البيانِ
كيف هان العيش والملح الذي بيني وبينك* خل عاد الكيف ودلال الهوى ذا شي ثانـي
كم سقيتك وانت ظامي كان نبعي هو معينك * وارتويتك ماانكران الشوق من نبعك سقانـي
ما وفيت بوعدك لجملة مشاعر يحترينك * ليه تطفي لهفتي والفرحه بدموع سخانِ
يمكن استهواك تعذيبي على شاني رهينك * يمكن اني افرطت في حبك وخانتني الأماني
والله اني ماجفيتك لكن افعالك تدينك * لونويتك بالجفا ماهو مطاوعني لسانـي
يوم انااحلف ماتصدق كن ديني غير دينك * خاف ربك في ماني ناقص تزود جناني
والله اني ما اقطع حبال الرجا من شان عينك * لين تاتي واعتذر لي عنك من هم طواني