Tweet
بما انو ما فيه قسم خاص بالاحلام فقد قررت نشر حلمي هذا هنا. مع اعطاء المشرفين الاعزاء وضعه اين يرووون.
لذلك جرى التنويه..
*البارح وأنا مسطح على ظهري،شفت في منامي حلم. حلم غريب بالمرة.
حلمت كأني ماشي في غابة. ماشي لوحدي وساكت. ماشي بكل هدوء وسكينه. والنسمات تهبهب بين الحشائش وتميل الأزهار. وكأني في الجنة. أش أوصف أشجار من كل نوع وخضرة بكل مكان. وكانت الشمس لسه ما طلعت. والقمر ينزل ورى الجبل. ومن كثر ما مشيت صار الجبل ورايه على أيدي الشمال. وفيه فراشات تتسابق على الزنابق. شي بصراحة يمجد الخالق. وكان فيه نبع ماشي وجنبه فيه نهر ماشي جنب النبع كأنهم اثنين إخوان. ولهم صوت خرير ما عمري سمعت زي كذا بحياتي.
وشوي وصلت مكان انتهت فيه الغابة.وما عاد فيه شجر.وانكشفت الدنيا قدامي ومن فوقي. طالعت قدامي لقيت في بحر قمت قربت من الشاطي. وفجأة لمحت شخص واقف على الشاطي . معطيني ظهره وقاعد يطالع في البحر ومو شايفني. ولا منتبه لأحد .أصلاً ما فيه إلا آنا. قربت جنبه اطالع فيه.
وأسأل نفسي هذا اش جايبه هنا؟ اش جالس يسوي لوحده هنا؟ ولمن قربت منو اكثر عرفته. تخيلوا مين طلع. ما راح تصدقو!
تصوروا طلع كريستوفر كلومبوس . أي والله كريستوفر كلومبوس. انا طبعاً عرفته على طول بس هو ما عرفني. أشرت بيدي وقلتلوا اهلين.
قام فز من الخوف وهز راسوا يرد عليه التحيه. فكرت بوقتها هذا ليش جالس يطالع في البحر؟؟
طالعت محل ماهو قاعد يطالع شفت جزيره صغيرة بالقوه تنشاف. وهو مو عندي حاط اهتمامو كلو في الجزيره هذي. قمت طلعت الناظور وصرت ادربل على الجزيره (نسيت اقلكم انو معايه ناظور) المهم: تصوروا اش شفت؟
شفت على الجزيره عماير طوووويله بالمره.يمكن الوحده 100 دور. وفيه بين العماير تمثال ما سك في ايدو مشعل الحريه.
اكتشفت بذكائي ونبوغ فكري . انو هذي أمريكا. أي والله طلعت هيه امريكا.
التفت على الاخ كريستوفر. لقيته قاعد يبربر بكلام مو مسموع. يعني بصوت واطي بالمره.
قمت قربت عشان اسمع اش قاعد يقول. تخيلوا اش سمعتو يقول؟ مع اني ما لحقت كلامه من الاول. بس اللي فهمتو من كلامه كلمه واحده.
سمعتها مزبوط وطنت ورنت في اذاني.سمعته يقول: (الله يلعن اليوم اللي أكتشفتك فيه) طبعاً ما قالها بالعربي. قالها بالاسباني.ومع اني ما افهم اسباني.بس انا قلت يعني اش ممكن يقول كريستوفر عن أمريكا؟؟
[blink]بالإذن من زياد الرحباني له وافر أمتناني[/blink]
Attached Files
تعليق