أنا منهو ؟ أنا مجموعة اوراق وحبر واقلام = ومجموعة مشاعر باختلاف الوقت مرهونه

بقايا اوراق بعثرها الزمن في رحلة الأيام = مع حلي وترحالي غدت في القدم عرجونه

وبعض اقلامي اعياها التعب صارت حطب وحطام = بقايا غلب ماضي ذاكره في ركن مركونه

شكت من كثر ما أشكي لها همي وما تنلام = وليه الومها واقرب قريبٍ خانني عونه

على المركى القديم انثر حروفي وارسم الأحلام = واسولف مع همومي واترك العبرات مسجونه

وانا شاعر ولي مبدا ثبات ونظرتي قدام = اباري كل قرم ولا ابالي باللذي دونه

قصيدي لانخيته سرني مايعرف الإحجام = حرابه في نحور اعداي وقت الجد مسنونه

ترجعني الصراحه للورا عشرين عام وعام = وش اسوي بطبعي هو كذا شكله ومضمونه

مضت عشرين عام أكتب شعر مايعجب الإعلام = مجرد شخبطه في نظرة اللي يجهل فنونه

ولو لي واسطه لاصبحت ذاك الفارس المقدام = بغمضة عين يصبح نجم والعالم يحبونه

ولكن حظي العاثر وقف لي وقفة الظلام = يعرقل كل خطواتي واشوف الشر بعيونه