أقفيت من عندك وجتني هواجيس = وهمٍ يجيني تالي الليل قاسي
ما انساك لك في القلب حب وأحاسيس = وماظن ياخلي تكون أنت ناسي
أذكرك ماهبت علي النسانيس = ولانسيتك كنك أحدى حواسي
اتنفسك في طلعة الفجر تنفيس = وأسقي الأمل بالدمع واحيي غراسي
ياما رسمتك شمس والليل خرميس = واشرق بك الخاطر وزال العماسي
وصوتك سمعته يقلب الصمت تونيس = واحيا الرجا من بعد ماكان ياسي
وذاك المحيا والشفاه اللواعيس = ينساب منها الشهد في وسط كاسي
وهذي كفوفك فوق جرحي ملاميس = ومن زود تحنانك ذهب كل باسي
احسها تجتاز كل الحراريس = لارخى عليّ الليل ثوبه لباسي
جاوزت في حبك جميع المقاييس = مدري أحاسيسك تشابه أحساسي
أنا هويتك صدق من غير تلبيس = مااحب شيٍ يعتريه التباسي
واضح ولا امشي في خوافي الدهاليس = أوزن قبل ماامشي خطاي بقياسي
من يبني سلومه على غير تاسيس = ينهد ماسواه من غير ساسي
هذا قصيدي ردده حادي العيس = ورددوه أهل الهوى في الأماسي
من قبل تدوينه ببيض القراطيس = ياما ارتجلته عند موقف حماسي
ثابت إليا هبت علي الرواميس = مازعزعتني في المواقيف راسي
خلك معي واعطيك منهج وتدريس = وارسيك لاتاهت عليك المراسي
وان كان ماصحاك ضرب النواقيس = ياشيب راسي منك ياشيب راسي
وبعتبرني افلست ضمن المفاليس = مادام مالي من وليف يواسي
واعيش باقي العمر رهن الهواجيس = ماغير ادير الفكر والهم قاسي