قصيدة جديدة لم تأخذ حقها من المراجعة
أهديها لكم وآمل قبولها



قالت تحب غيري قلت ذا شي أكيد = من وانا طفل لا من قبل هذا بكثير
من وانا بظهر جدي حب ماهو جديد = وانولدت وتلقتني بحضنٍ حرير
قالت اركد وهذا المزح لاعاد تعيد = قلت لا والله الا صادقٍ وش يصير
حبها في شراييني ونبض الوريد = واختلط في دمي واصبح هواها مصير
وصفها مايوفيه الشعر والقصيد = فاتنه حسنها ماله شبيه ونظير
قالت اتحبها اكثر قلت مالك رصيد = قطره أنتي وهي البحر المحيط الغزير
من يقارن بقطره جم بحر مديد = لاوازيدك بعد غيري هواها كثير
وما أغار إن عشقها غيري افرح واريد = وان بغضها أحد لا والله إلا أغير
قالت اعييتني كنك لشخصي تكيد = من هي اللي بغلاها ودك انك تطير
من هي اللي هواها عن سواها يزيد = من هي اللي خذت عقلك وخلتك غير
قلت هي ديرتي ولاني العشيق الوحيد = دونها كل صنديد وحدٍ شطير
دونها كل غطريف ٍ وباسه شديد = شامخه من نواها بشر ماله مجير
شفتي شلون حظي كيف صايرسعيد = شفتي شلون شوقي يستحث المسير
واعشق الموت دام انه حياة الشهيد = لجلها اموت واحيا لجلها ابقى أسير
ديرتي ديرتي والله عليم وشهيد = إنها حبي الأول وحبي الأخير

جــدة 5/1/1425هـ