يا شباب مره من المرات كنت قاعد أتمشى في غرفتي (أتمشى عاد من كبرها) وقاعد أحوس في أغراضي وفجاءة شفت صوره لي يوم آني صغير مال أمها داعي وأغمى علي شوي ثم يوم صحيت قعدت أناضر الصوره زين ماش ماعجبتني ابدن وأنا متأكد إن المصّور يوم صوّر ذي الصوره استقال عقبها وقال
(أنا تارك أهلي ومغترب عشان أصور ذا الأشكال لا والله أروح لاهلي اصرف) ... بس أحلا ما في الموضوع إنها ذكرتني بأيام الصبا .. أيام ثالث(ب) الله يا الدنيا أيام الميرندا في المخبات اليمين وسندويتش الجبن مع مربى الجح في المخبات اليسار وبدلة الرياضه تحت الثوب والشماغ عاقدته الوالده عشان بدري على ام من جابتك تفكه وأيام معك سلف نص ريال ... وأيام حصة الرياضه اذا نطل الاستاذ الكوره ( وهذ أكلف ماعليه) واجتمعنا عليه كلنا واللي يشوفنا من بعيد يحسبنا ناس مجتمعين على حادث ومن شروط اللعب مافيه مزع الله يا الدنيا ايام اذا جاء فاول فصخت الكندره اليمين
مع اني الى الحين ما ادري وش الحكمه من ذيك الحركه الله يالدنيا ايام اذا جت مباراه في الفسحه وشات واحد الكوره فوق في السماء قالوا كل اللي يناظرون المباراه ( هوووووو) الله يالدنيا ايام اول بلنتي ثاني فاول والمخفات يقولون اول أوت ثاني مرمى الله يالدنيا ايام اذا جيت البيت وانت ملعون جدفك مصفقينك ناس في سادس ابتدائي الله ياالدنيا ايام التقويه في العصر وايام كان اللي عنده سيكل أربع وعشرين كان كل اللي في الحاره يدقون له تحيه واللي عنده اتاري (( <-- غبااااار )) اللي عنده اتاري ما يتنزل يطلع للشارع يسلم علينا أيام اذا طلعت باالسيكل ورجعت للبيت وعلى ظهرك خط اسود (( وهذا يجي بسبب اذا مريت من عند نقعت مويه فالكفر اللي ورا يرش على ظهرك )) المهم اذا رجعت للبيت وشافتك أمك الحنونه وشافت اللي على ظهرك وسددت لك خطافيه و أنهت المباراه بالضربه القاضيه
... الله يا الدنيا ايام الاختبارات كنا نلعب سبع الحجر وكنا نلعب لعبة التفاخات المليانه مويه وخذ يا نطل على السيارات واذا لحقنا ومسكنا نقعد نصيح ... والصياح انواع .. ومنها :
1- صياح من دون.. مناشق ( وهذاالنوع من الصياح للمشاكل السهله )
2- صياح بمناشق ( هذا للمشاكل قليله الصعوبه )
3- صياح بمناشق قوي كنه واحد مزكوم وكل شوي يكت خشمه ( هذا للمشاكل الخطره )
4- صياح يشمله نوع من ازرقاق في الوجه ( وهذا يدل على انك رحت وطي )
5- صياح اللي إذا بغيت تتكلم ما قدرت( يعني أنت تبي تقول مهوب أنا) ومع الصياح من هالنوع ذا تلقاك تقول ) مب مب مب اااااا ... وباقي الحروف الله واعلم وين راحت .( مزنوط )
الله يالدنيا ذيك الايام اللي كنا نشتري فيها كيسه الالعاب اللي فيها الحيوانات البلاستيكيه وكنا نحط بيبان من ورق ونلعب فيهم مباراه ( كانت قمه الوناسه) وكل ما ذكرت ذيك الأيام ضاق صدري <-- والعيارات على قفا من يشيل .. منتب عاقل يا الزير السالم
المهم عقب هالذكريات .... قمت وشققت الصوره المهم أنى قعدت أفكر في( بزارين ) ذا الايام لقيت العجب العجاب بزران هالايام يروح للمدرسه وفي مخباته اليمين سي دي والمخبات اليسار سـكـنر ( قويه النصبه ) ولقيت بزران هالايام اللي عنده بكيمون وخاصه بيكاتشو زي اللي معه سلسله مفتاح ذيك الأيام ولقيت البزر في وقتنا الحاضر ما يقول معك نص ريال زي مثل أول لقيته يقول معك سلف ماستر كارد... عادي البنك الامريكي والا الراجحي ما تفرق وتلقى البزر ذا الايام اذا نجح من رابع ابتدائي يقول بابا ابي لكزس وتلقى ابوه يقول لا ... تصرف بنزين واجد وش رايك نشتري لك طياره اف خمسطعش تمشي حالك فيها الين يفرجها الله وتلقى الولد يصيح يقول : لا ابي ترينيدو والا.. بي 52 ...
ولقيت ان بزران الحين عكس البزران اول :
اول كان البزر الدب دايم يعيرونه يا الدبي الفيل ياللي كنك رقم خمسه ياللي اذا روشوك اهلك يطلعون بك في الددسن ويخلونك في الحوض ويدورون بك عشان تنشف .. ياللي شكلك من بعيد كنك شارع ما زفلت ياللي شكلك وانت تضحك كنك دوار .. ياللي اذا تثاوبت يصير فمك كنه نفق المعيصم ... وكان الدبي في ذيك الاوقات محدد في الخريطه بسبب ندره الدببه ذيك الايام .
ولكن الحين انعكست الآيه فصار النحيف الرشيق هو اللي يعيرونه وهو اللي صار نادر واذا ما صدقتوني ابيكم تدخلون أي فصل ابتدائي وصدقوني أنكم راح تحسبون أنفسكم داخلين محل أثاث لتفصيل الدولايب والكمودينات
وتلقى النحيف يقولون له رح أنت وجهك اللي كنه نقطه زايده في أول السطر .. رح ياللي كنك ضلال مسمار .. ياللي كنك هيكل عظمي حق العلوم ومغطينك بقماش .. ياللي كنك بيكاتشو مسوي رجيم .. ياللي كنك قلم رصاص مبري اللين داخ ... ويقولون له أنت أمك حملت فيك لمده أسبوع وتلقاهم يقولون له إذا لبس ثوب يقولون له انتبه لا يغلط فيك الأستاذ ويحسبك طباشيره .
وتلقا ذا النحيف المسكين يـضـطـر انه يسمن مع ذا الفيله وتلقاه يـظـطـر يروح معهم ويفرمون كل اللي في المطعم (هرفي وغيره ... ين ذا المطاعم أول .. مالك الا مطبق وتخب علينا بعد )
* عذرا لبنات المنتدى : أنا ادري إنكم مافهمتو نص اللي قلته بس أرجو المعذره لان هذي شغلات أولاد مهيب لكم وأنا ما ادري عن البنات وش كانوا .. والحين وش هم .. لذلك أنا ما تكلمت عنكم

* الطفو له شيء جميل ولكن في أيامنا كانت كابوس ينتظر المرء الخروج منه فعلى سبيل المثال : أنت الحين يومك صغير ورحت لعيال الجيران ولا دروا اهلك انك رايح المهم انك جيت بعد ساعتين وشيء طبيعي أول ما يستقبلونك اهلك بـ بقس وسبلكس خلفي ثم يرقى أبوك فوق الزاويه ويسوي حركه سنوكا ويطب عليك وتدخل أمك الحلبه ومعها كرسي الحكم وتدبجه على جبهتك وثم أنت تطيح على الأرض صريع ويجي الحكم يرفع يدك أول مره وتطيح ويرفعها ثاني مره وتطيح ويرفع يدك ثالث مره ولكن ما تطيح وترفع إصبعك وتقوم ترتجف زي هوق هوقن وتصفقهم كلهم ( ايه هين ) المهم بعد الجلد والمجالد يجون اهلك ويقولون لك وراك ما علمتنا كان ما قلنالك شيء .... والله ما عرفنا لهم اذا قلنا لهم.. قالو لا .. وهم يقولون لو انك قايلنا كان وافقنا .. واذا ما قلت لهم صفقوقك .
ولكن الحين تلقى البزر يرسل لاهله ايميل يقول فيه افلقوني اذا شفتوني الليـــــله أنا في العليا انطل أرقام .. ههههههههههههههههه
وشكـــــــــــــرا لكم ..................