هذه القصيدة قلتها في بداية حرب الصليبيين على العراق ـ آمل أن تنال رضاكم .


دقت طبول الحرب واشتبت النار = بتحالف اصحاب الردى بوش وبلير
جيش عرمرم هادر الصوت جرار = للذود عن شارون واحفاد شامير
قالوا بنلقى الشعب واقف بالازهار = ويعزف الحان الفرح والتباشير
وماحصلوا غير الفشق يرقص الزار = دارت منه روس الخواجات تدوير
طاحوا منه صرعى على جال الانهار= وبعضهم مجروح مكسور تكسير
وارسل عليهم والي العرش الاعصار = عطل عليهم تقنيات المناظير
لكن لقوا في الشعب خاين وغدار = ناس يبيعون ارضهم بالدنانير
وصمت الدول مدفوع مليار دولار = باعوا دم الأطفال من دون تبرير
بيع الذمم له تاجر والف سمسار = واقع أليم ومر ماهوب تنظير
دارت رحاة الحرب والوقت دوار = وتعاظمت قوة عيال الخنازير
حرب تدك ارض العرب ليل ونهار = ترفع شعارنحرر الشعب تحرير
صاروخها الاول على الظلم بتار = انا اشهد انه دمر العدل تدمير
وصاروخها الثاني حمل وصمة العار = بدم العروبة سطر الذل تسطير
وصاروخها الثالث نفض طمي وغبار = عن خزينا اللي غلفته الأساطير
وصاروخها الرابع نسف منزل الجار = نثر عظام اهله في الجو تنثير
وصاروخها الخامس ردع كل الانصار = وسخر الحكام للغرب تسخير
عقل اللبيب بقومة كروزهم طار = ومن قوته درع العرب يعكس السير
ولاشك في التنديد والشجب شطار = اهل القمم نعقد لها العزم ونشير
يالمعتصم ليتك تشوف الذي صار = من بعد ما اختلت جميع المعايير
عن الحريم تهتكت كل الاستار = بايدي جنود(ن) صففوهن طوابير
يكشف عباية بنت الاسلام كفار = قالوا تخبي تحتها الغام تفجير
ايدي النجوس تلوث اجساد الاطهار = حن مرروها فوق الاجسام تمرير
في ظل ابو عداي بعثي ومكار = فرش لشعبه في طريقه مسامير
الشعب ضايع بين غازي وجبار = محرقين النفط بير ورى بير
وين الشهامة وين هو دمنا الحار = وين الرجال الصاملين المغاوير ؟
المشكلة لاشيخ يستنكر انكار = وأهل الفتاوى مالهم أي تأثير
وشبابنا يرقص على دقة الطار = مفتون في راشد ونجوي وبالخير
وبعضنا مثلي شجاع بالاشعار = والا فهو تامن على راسه الطير
تراه هذا حالنا يابن الاخيار = حال(ن) تساوى فيه سمحان والعير
مجد العرب يالمعتصم صار تذكار = ارجع لقبرك والتمس لي معاذير