ألأيام تجري والعمر مثل ألأيام
أعمـــارنا محسوبـــــــةٍ بالدقيقه
نجري ورى هم المعيشه ولاحلام
وننسى الحقوق اللي علينا وثيقه
ننسى حقوق الله كفال الايتام
ربٍ يضيع من يضيع طريقه
ربٍ خلقنا نطفةٍ قبل الاجسام
من نطفةٍ ثم علقةٍ ثم عليقه
يكسيه لحمٍ حافظه جلد وعظام
وعروق عجلٍ دمها في دفيقه
وااله مانقدر وفا حقه التام
سبحان حماي البيوت العتيقه
ارجع يا مسلم لاتوهقك الاوهام
لاتغرك الدنيا بزينة ابريقه
ألاقداريابن آدم ترا رمحها سام
كم واحدٍ خذه القدر من فريقه
وين الرجال اللي لهم فعل واعلام
وين الرسل وين الملوك العريقه
راحو من الدنيا بمترين من خام
امتار خامٍ ربطت بالسليقه
خلك على العليا صبورٍ وعزام
روم المعالي وعتـنقها عنيقه
رافق ارجالٍ لابدا لازمٍ هام
يقضون حاجات الزمان الشهيقه
ناسٍ لهم في ساحة المجد مرسام
اللازم الكايد تحل أتعليقه
دون الخوي تاقف مواقيف الاكرام
هل فزعةٍ تشفي الكبود الغليقه
لاتحط نفسك بين لايم ولوام
والفاسد المفسد تجنب طريقه
مريض قلب وفيه غيضٍ وكتام
ونفسه على درب المنافق شفيقه
احذر تغرك ضحكته والتبسام
وده يحذفك لو قدر في حريقه
مامن ورا رفقته كون التندام
وراع المثل قال المرو من رفيقه
من طاح من رفقة هل السو ماقام
الى درى أنك طحت عجل طقيقه
واحذر تسمَع هرج واشي ونمام
مامن ورا النمام كون الحميقه
الاسلام يابن آدم له أوصول واحكام
لازم تطبق بالأصول الأنيقه
حافظ على الأحسان واركان الأسلام
واحرص على الأيمان وامش بطريقه
حنا بوقتٍ صايرٍ له تلطام
صار الأخو ماعاد ينفع شقيقه
والله وصانا على وصل الارحام
ماقال هملهم وضم العشيقه
حقٍ عليك مواصلتهم والاسهام
ومشاركتهم كل فرحه وضيقه
تراك ما تبقى نشيطٍ وجزام
الأعمار تسرقها الليالي سريقه
ترجع الا ضعفٍ وعجز أوتحطام
وتقول وين اهل الكبود الرقيقه
الشوف يقصر والجفن به تهدام
والجسم يتعب ماتساعده سيقه
والسمع يثقل والظهركله آلام
اليد تنافض والعصا ما تطيقه
عمر الفرح والعز والمال مادام
لابد ماياتيه وقتٍ يعيقه
نسهر على التلفاز ونتابع انغام
ننسى الفرايض ونتسمع موسيقه
ونتابع افلامٍ بها عادل أمام
وحسين فهمي والبنات الرشيقه
ونوقت الساعه على حزة الزام
خوفٍ من التآخير لوهي دقيقه
ويرفع آذان الصبح ويقوم الامام
وحنا نيامٍ في حلامٍ عميقه
صلو وحنـّا من ردا الحظ نيام
ومن قام منا ما يصحي رفيقه
لو ياصل المخلوق منا مية عام
ياتيه لحظه غرغراتٍ أبريقه
ماخلده ماله وجاهه والأوسام
يرحل عن الدنيا وجمعا صديقه
ويلف ويكفن بله شاش وحرام
ويحط في قبرٍ ألحوده غميقه
ويجيه من ينشده وش حط قدام
ويكشف ملفه عند رب الخليقه
في ساعةٍ ياقف بها كل آلانام
ما ينطق الا من دعي لتحقيقه
ويشوف سجلٍ ما خطت فيه ألأقلام
في ساعةٍ ماهي تغيب الحقيقه



ـــــــــــــــــــــــــــــــــــــــــــــــ

هذه القصيدة قيمة جدا جدا، وفيها من العبر والنصح ما يبكي العين، في حين قساوة قلوبنا نسأل الله العفو والعافية والسلامة، وهي للشاعر/محمد ال جابر المري...فلا فظ فوه.

أخوكم/احمد البشيري