صباح الخير جميعاً .. >> ركزوا على هالكلمتين و لاحظوا نهاية الموضوع

مساعده : اللي بيقرأ الموضوع كامل .. يفصل الأتصال ..
ملاحظه : الموضوع يمكن ما يعجب البعض لأنه مقال ساخر.. فالعذر والسموحه


كلنا طبعا نعرف عصب الحياة اللي هو المال وبمسمى اخر الفلوس وبمسمانا
حنا القروش و الدراهم .. المهم ان لها مسميات كثيره والعملة وحده ..

وبصراحه الموضوع هذا ماودي اطول في مقدمته لني ماني عارف من وين ابدا في اكله مثل اللي يقول : اكلك منين يا بطه :D ...

فعلا موضوع مشوق واللي خلاني اكتب عنه اليوم كنت في احد البنوك في زيارة وديه لاساحب ولا مودع بس لقافه كذا أتفرج وصراحه شفت مستويات متفاوته من المراجعين شفت من قالت الدنيا لهم شبيك لبيك وشفت من قالت الدنيا لهم اتفوو عليك (( طيب خذ نشف وجهك )) ولكن يجمعهم بنك واحد وانا واحد من الناس اللي لهم قصة غراميه مع القروش لأني حبيتها من اول نظره (( حب من طرف واحد )) وبغيت القروش تبادلني نفس الشعور ولكن القروش ومن تحب(( ياعيني على اللي حب ولا بلاش )) المهم اني شفت القروش متراكمه فوق بعضها وكنهم يقولون لي وللي ماسكين السرا وراي شموا ولا تذوقون :D مع انهم مفروض يحطون لافته زي شاحنات البانزين (( الرجاء الابتعاد عن القروش 100 متر خوفا عليك أيها العميل الفقري وليس اكثر وحتى لاتصاب بداء الثعلبه )) ..

المهم بعد ماتفرجت هممت للخروج من البنك لكن شفت براد ماي قلت بوقف اشرب ويوم شربت لقيت فوق البراد صندوق مكتوب عليه صندوق الاقتراحات كتبت اقتراح وقلت فيه : اقترح تعطوني مليون ولا اثنين وتفكون أعماركم من مراجعتي لكم كل اشوي على اشويت قروش ماتستاهل جيتي والا تعطوني مليون ريال اسوي لكم فيه فديو كليب دعايه للبنك (( اشتغل النصب))

وميزة الفلوس انها ماتفرق بين كبير وصغير شين وزين طويل وقصير نحيف ونحيف (( قصدك دب لاتستحي )) وبين الاسمر والابيض وبين الاصيل والدفه وكلن الله قسم له منها نصيب سبحانه .

وفيه ناس عندهم قناعه من الفلوس مايحبونها (( انا معك مايحبونها بس يموتون فيها )) زاهدين في الدنيا ويسمون الفلوس وسخ دنيا (( والله ياني اعرف لي ناس من كثر الوسخ اللي عندها لو تحطهم في حمام سباحه وتكب عليهم سطل صابون تايد مانظفت )) ويحاولون يخففون من وطئ شح القروش بذكر الصحه والراحه النفسيه (( و الاقساط والديون ومراجعة كراج السيارات كل اشوي )) وانهم ينامون بدري عكس التاجر يتقلب في فراشه ماينام الا متأخر (( يبغون يبردون على قلوبهم )) ويقولون ان التاجر يوم القيامه اكثر الناس حساب (( ياويلكم يا فلان و يافلان .. الاسماء مشفره )) و انه اللي يجيهم راضين فيه ولا هم بطماعه ولا يبون زود لكن لا جا اخر الشهر شفتهم صافين على مكاين الصرف يبغون الراتب ويقولك انه اكثر اللي كانوا صافين سرا عند الصرافات في اول يوم للسنه الالفيه الثالثه كانوا زهاد زياده عن اللزوم طمعوا انه يزيد في حسابهم كم صفر على مطلع السنه الالفيه الثالثه لكن طلع توقعهم مخيب وجاهم تليف في الغضاريف والركبة و صاروا يداومون في مراجعت المستوصفات يعالجون الروماتزيوم اللي نتج من كثر الوقفه عند الصراف ..