Tweet
إسمحيلي يالغرام العف يا الوجه السموح
إن لزمت الصمت أو حتى لبست الأقنعة
أعترفلك ما بقي من عالي الهمة سفوح
انحدر كلي كما طفل تحدر مدمعه
من يبي بالله يفتحلي غلق صدره أبوح
ضاقت الدنيا بشاعر طيب قلبه ضيعه
ما قبلنا الحظ.. قولي وين ابرحل وين أروح
الصبر ياهو يعذب والأماني موجعه
آه يا جود الحزن وياي والفرحة شحوح
ضايع بهمومي الغبرا بوسط المعمعة
أشتكي لوسادتي دنياي واسمعها تنوح
كنها بعضي . وبعضي وين هو منهو معه
إيه أنا والعالم المغرور والياس اللحوح
خايض حرب الرياح اللي تسوق الأشرعة
مختلط في عبرتي حبر الشقا ودم الجروح
ومستوي في نظرتي غرب الوجود ومطلعه
عودي المبري ما بقابه من عطايا الوقت روح
وفصل خامس حاير بين الفصول الأربعة
وراس مالي ذكريات وحلم وآمال وطموح
لا صديق ولا رفيق ولا طريق واتبعه
نوب أسافر في سديد الراي ونوبٍ في جنوح
مختفي صوت الحقيقة كيف واشلون اسمعه
سامحيني دام عذري واضحٍ كل الوضوح
واسمحيلي بالرحيل بلا تذاكر وأمتعة
كلمـــات / أسير الشوق
تعليق