سلام عليكم ورحمة الله وبركاته
اخواني اعضاء منتدى الديره
انا فتحت موضوع جديد
لاجل اشياء مدري كمهيه لكنها بتجي مسيره
مع الكتابه
وانا والله اني احبكم واعتبركم اخوانيه ومنكم اللي اكبر
منيه ومنكم اللي اصغر منيه
وكلكم والله في مقام الأخ والرفيق
إن بغيتوها من جهة القبيله فنحن من قبيلة وحده
واخواننا من جيراننا من غامد وبني مالك ومن الحجره
ومن كل القبايل اللي معرفتهم غنيمه ولا عليها غبينه

الشئ الأول في خاطريه
اسمعوا اسمعوا
افلحنا مره استراحه في الرياض هنيه في الشفا
عزمنا فيها العريفه جاء من الديره
وقلنا كل الحماعه تعزمه مره وحده
بدال مايقعد في كل بيت وكلافه
حتى عريفتنا جزاه الله خير اشاد بهذه الفكره
وقال ياليت نسويها في الديره
المهم
اللي في الأستراحه والله والله والله
لومعي بصراً وفي يديه ذيك الهراوه اني لاكسر
ذوليك الورعان والشباب
ياجماعة الخير
ولاواحد يقوم يصب القهوه
اللي يلعب كوره واللي برا يدخن واللي معششن
في السياره تقولنه عبداً
المهم ولا واحد قام يصبل القهوه
والله والله ولا ابالغ انهم فوق العشرين
ولاواحد ولا واااااحد قام قربله صحناً ولا قدم بفنجال
الله فزع لنا بالنشامى شرواكم
ناساً يصبون القهوه فوق الأربعين وشيبان
يدرجون بالدلال
وش يتفشلون مع الرجال
هذا الشئ حقيقه نكد عليه وكنت احسب
ان رجال القبايل مايرضون الخطيه
وعزمت اني اقلكم عشان تصحون اللي مثل ذولي
حتى الحريم والله
ماعد ولابنات يصبون القهوه ولاشاهي ولا حبة الله
ماهلا عند الدش
رغم ان واحد من الجماعه سكر الدش مدري دس الرسيفر
في الأستراحه يوم جوا الضيوف
يافشل الفشل
الضيف ياخذ علوم ويرد علوم
ونحن اللي يلمح في الدش واللي يضحك على العريفه
واللي يقول وش ذا التخلف
واللي يشادق لحيه تقولنه مقرونناً يتهزا بكلام الرجال
وحنش بينهم مفزوع من ذا الشئ
معقوله انه احفاد الرجال اللي كانت تجي من روسهم
الهيله يجون كذا
لكن الله انه يهدي الجميع ولا يواخذنا بسفهاننا

الشئ الثاني
المعمرين اللي يجون في التلفزيون
المعمر الياباني ذاك يقول انه عمره 115سنه
اسمعوا والله والله
وهذا كلام عن جديته وعمرها فوق التسعين
وتقول من يوم اخبر ذيك الكهله في الجماعه عندنا
انها ماتغيرت
وتقول انها على حالتها ذيك من يوم اعرفها
رغم ان هذه الكهله يعلمنا شيبه من جماعتنا
رجال وقير ورجال والله انه من نادر الرجال في المجتمع
يقول ان هذي الكهله اول زمانها كانت يعني
كثير تعاملها مع الجن وتعرف تطلع الجن من الناس
بواسطة الجن اعوذ بالله منهم
المهم ان هذي الكهله جوا الجن عندها واعطوها رجال حمار
وقالوا كليها وابت تاكلها وجوا وكسروا ظهرها
والي يومكم هذا ظهرها مكسور تسعين درجه
صحيح والله وهذي ماتزوجت بسبب كسر ظهرها
وعايشه الأن عند ولد ولد اخوها وجابلها خدامه ترعاها
وإلى يومكم هذا يمكن من خمسن سنه ماتطلع من البيت
حتى المستشفى على مااعتقد ماتطلعه
المهم يقول الرجال هذا
ان هذي الكهله عمرها فوق الميه والثلاثين
واللي يبغى يتأكد يروح دار القهاد وينشد
ايوه هويه مايحطونها في المعمرين في العالم

الشئ الثالث
يوووووووه يوووه ياذا الشئ اللي باقوله
التفحيط يوووووووه
ذاك اليوم ولايعيد ذاك اليوم
افلحت البقاله لاشتري بعض الأغراض
يوم طلعت والا ذاك الشباب يفحطون
يجيك مسرع ثم يلف الدركسون وتقول السياره تمشي
على الجنب وبعدها سياره وبعدهم سياره
كلهم مليانه شباب معتبه مخورين برعين
المهم انا سمرت في كانيه ماعد اقدر ادق ريوس
واطلع بالسياره
وشويه اللي دوريتين يوم جت
وحده وقفت جنبيه ودعونيه
احسبهم بيقولون من اللي يفحطون
اثرهم دعونيه يحسبونيه اتفرج فيهم واشجعهم
ويقولون ليش وقفت هنا هات البطاقه
المهم قلتلهم
الله يقويكم عليهم لكن انا ياسيد ماقدرت
اطلع من ذولي كيف ارمي بنفسي بينهم
لاوالله
ويوم شافنيه كذيه قال امسك بطاقتك
واطلع بسيارتك قوام ويالله لف مع الحاره
ولا عد نشوفك هنيه
قلت كرامه ماهلا ابشروا
ياناس ياناس
التفحيط يبغيله عسكراً الواحد مثل الباب
خلهم يدقون المفحط يخرجون التفحيط من راسه
والله والله انهم البشونا في انفسنا وفي سياراتنا

الشئ الرابع
والله يااخون ان الدنيا تغيرت وتغيرت كثير
روحوا بيوت الديره
شوفوا الدشوش شوفوا البقر من عندها
والغنم من يرعاها
كلهم اجانب وعمال
واهل البيت ساروا زي اهل المدن واخس منهم
وانا لله وانا اليه راجعون
وش نسوي مالنا غير الصبر والدعاء لأنفسنا بالحمايه
واللي يبغي الحمايه يطلب الله الستر
لإن الستر هو الشئ اللي يبغاه الأنسان في حياته
الستر الستر ادعو الله به
واللي معه مشكله لايقولها للناس
ولاتثقون بحد
ولا تقولون ياصديق في ذا الزمن
قولوا يازميل
لإن الصداقه غير موجوده في زماننا هذا
والزماله مصلحه ويامكثرها


ونهاية الكلام اسمحولي ان اعطيكم ذا السوال اللي تحلونه
السوال هو انك تعلمني متى تنقال هذي الكلام في الرجال
يعني تعلمني متى تنقال في الشخص
1- الغندور
2- القرم
3- المطلق
4- الصميدع
5- النخولي
6- السايب
7- الحايب
8- الحبث
9- الأهطش
10- المتنصح
11- المتعزز
12- الدخدوخ


وها علموني بها
واعذروني تراني مااعديت هذا الموضوع
يعني ذا الموضوع على الهوا مباشره
كما برنامج حامد الغامدي لفاق المشاهدين
الله ماابيخه ذاك البرنامج

هيه مااطول عليكم
لله يستر عليكم
ولاتقولوا حنش حنس وانتكس
يعني تغير عليكم ولا انه نسيكم
لكن الله يعافيكم

والسلام عليكم ورحمة الله.