هذي سالفه عن رجال اولاده يترزقون الله في وظايف خارج الديره ومابقي عنده الا واحد من الاولاد اسمه حسن
وكان حسن مخاوي له شله من عمره يعني حول 18 سنه وكل يوم وهم عنده في البيت سهر وقلق وبراد رايح وبراد جاي مستغل طيبة ابوه وسعة صدره واللي رايح فيها اخته المسكينه عمرها 11 سنه وكأنها قهوجي وكل ليله على ذا الحال
ويوم من الايام احترقت البنت حرق خفيف.. وحسن لما شافها اخذ الموضوع ببرود وكأن ماصار شي والبنت تحملت مسكينه وآخر الليل راحت تنام
المهم في الصباح شافها ابوها لافّه على يدها شاش وسألها عسى خير قالت لا بسيطه احترقت البارح وانا ازيّن الشاي لحسن واخوياه
قال الشايب حصل خير قالها وهو من داخله يغلي وعزم انه يدخل على حسن اللي باقي نايم ويطأ في بطنه لاكن الام هدته وقالت خذ الامور ببصيره
ولما صحي حسن قال له ياحسن وانا ابوك اخوياك ذولي مشغلينك ومشغلينا وانتم وانا ابوك سهرانين لين الصبح حتى صلاة الفجر يوم تصحا ويوم اروح للمسجد واعود وانت باقي نايم
قال يايبه ذولي اعز اصدقائي ورجال يعجبونك ولا فيهم مايعيبهم قال ابو حسن ياولديه تعبتنا وتعبت اختك والكلام هذا مايصير على الاقل خلوها في الاسبوع مره واحده
قال يايبه هذولا اخوياي ولا ابغا اخسرهم قال طيّب وش رايك اسوي لهم اختبار واوريك اللي يعزك منهم واللي مخاويك على شان مصلحه
قال حسن مافيه مشكله واكيد كلهم بتشوف منهم ما يرضيك قال ابوحسن.... على الله

المهم ابو حسن اخذ له خروف وقّطعه وحطّه في كيس قال ياحسن اذا جاء اخوياك الليله قل لهم ان ابي ذبح رجال وقطعناه وحطيناه في الكيس وابغاكم تعاونوني ونروح ندفنه في الخلا
قال حسن تم
المهم ان الشباب تجمعوا في الليل عند حسن وكان حسن يروح ويجي على غير العاده قالوا سلامات وش فيك رايح جاي قال لا خير ..المهم وهم متجمعين دخل الشايب وفي يده الكيس اللي فيه اللحم وطالع في حسن وقال يالله وانا ابوك قالوا الشباب خير يابو حسن
رد حسن وقال هذا رجال ذبحناه ونبغا نروح ندفنه في الخلا من صديقي فيكم ويخاويني وما فيهم واحد احترك من الخوف وقامت الاعذار وكلٌ يدور الباب وغمضة عين ولا بقي احد قال حسن وينكم اصدقائي والا لا قالوا ياخونا هذي فيها قص رقاب مافيها صداقه

قال ابو حسن شفت اخوياك وانا ابوك اخويا الضحك والسهر
بس اسمعني ابرسلك لرجال من القريه اللي بجنبنا لي عنه 5سنوات ماشفته روح له وقول له ابوي ذبح واحد ويبغا فزعتك تدفن معه الجثه في ديره بعيده
وتمر على فلان في الديره الفلانيه وتقول له مثل ما قلت للاول

ويروح حسن للاول قال ابشر بعزك وعز ابوك ويروح للثاني ومثل الاول
وشوي وان الرجلين في البيت كل واحد يقول اجل همه هاته ولا تهتم انا ادبره
المهم قام ابو حسن يضحك قال هاه ياحسن شفت الفرق وانا ابوك قم هات العشاء للي يستاهلونه ما هم الرمم اخوياك
قال حسن والله ما عاد اصادق الا مطلق
المهم وتعشوا اصدقاء الشايب القدم عند ابو حسن وحسن
هذي حكايتنا الليله
والسلام