الأخ الفاضل / النمر العربي .......سلمه الله

كلام صحيح ، ولو أنه يستثنى بعض مقاولي البناء ، ويحل محلهم أصحاب مكاتب العقار والله الموفق .

نعم صحيح الا من رحم ربي.

أسأل اللي ذاق من بياعين الغنم المرارة , والغش عيني عينك بأيمان كاذبه , لا والمقاولين بعد ادهى وأمر , معك ياسلام يبني لك البيت ويشطبه ويعطيك المفتاح وتسكن , كل هذا قبل ما تكتب العقد , لكن اكتب العقد , اعطه الدفعه الأولى , يشد الخنزيرة , يبدأ في حدادة القواعد , ويجي المهندس, من هنا تبدأ النذالة , اسر ياليل , وتبدأ شغلة اللف والدوران , وعكننة العمال , وهات يا غياب ويا أعذار والمسكين صدّى حديده والبطحى نفرت بها المعاصير , والسمنت انسرق , والطوب افلح أسلاف ويا شهر اغد ويا شهر تعال . والله يخارجنا.

وبعد دخيلك , الوكالات حقة السيارات يجيك واحد (تئبرني خيوي) نحنا هون بنجبلك البدك مافي متلنا , شو بدك نحنا بنجبلك , بدك لون , كستنائي , فيراوني , أسود ملكي , متل ما بدك , نحنا حادرين عيني , يخزي العين ( i am soory) أيام سوري , شو بتشرب , يا متوع , بدك كافي , أو بدك صفن اب ,

هسا جايلك. انت على كذا تقول الأدمي هذا ماعنده غيري في الوجود وشكله ابن حلال وارتاح لي وارتحت له , يسهل لك كل شئ , وتمشي الأمور تمام التمام , تاخذ السياره يجي ميعاد اول فحص , تدخل السياره الورشه الخاصه ويعلم الله ايش اللي يصير , تجي على موعدها يقولون لك بعد أسبوع , طيب أعطوني سياره امشّي بها أموري , ماعنّا مشي حالك , تمشي حالك , تجيهم مره ثاني لأي سبب , تقابل نفس الشخص اذا لزم الأمر , هنا الصدمة من الأذن الى الأذن , خيوي شو انتي شريت السياره لو شريتنا نحنا , هاد العنا , بدك أهلين ما بدك البيدك ساويه , ويقفي ويخليك. واش رايكم معاناه والا لا؟


أخوكم/احمد البشيري