مواقف محرجة طريف .. او طريفة

[الزاهر]

اخواني كل انسان منا مر بموقف محرج وطريف في نفس الوقت
او مضحك لذا ارجو المشاركة بما لديكم من مواقف حصلت لكم او
حصلت لاحد اصدقائكم ويكون فيها نوع من الاستفادة والعبرة

موقف محرج
كنت متعود اسهر مع بض الاصدقاء في مقهى نلعب ورقة
وفي احدى المرات تاخرت عن الشباب وعندما وصلت وجد اللعب حامي
دخلت على الشباب كلهم طالعو عالى الباب عندما دخلت الا واحد منهم كان ظهره للباب فا اشرت للشباب اسكتو ابغي اعمل في
خوينا الذي ما شافنا حركة مزح اخذت العقال ووضعته في رقبته وانا خلفه ووضعت ركبتي في ظهرة وشديت العقال ولم يستطع النظر للخلف حتى يراني وكان ياحول ان يبعد العقال عن رقبته وانا اشدة بقوة
حتى كاد ان يغمى علية والشباب مستغربين حركتي
وعندما فكيت الرجال طلعت ما اعرفه ولا يعرفني وليس من الشباب
مجرد زبون جلس يكمل لهم ربع ...... خجلت واعتذرت بكل ما اوتيت من قوة والعرق يتصبب مني والرجل يمسك رقبته وينظر لي با ستغراب
بعدها لم استطع الجلوس عدت من حيث اتيت
وكان موقف لا احسد عليه.

[احمد السريفي]

فـــــــــــــيه العافيه

الصدق انك جبت العيد

عاد انا احسن منك يالزاهــــــــــر.
في احدى المرات كنت معزوم عند احد الاسر المهم قدموا العشا ورحبوا وسهلوا وقلطونا ,وردنا على العشاء وضربنا بالخمس ,
ساعة قمت المفروض اني اكثر بالخير ولكن جبت العيد بدل من اقول كثر الله خيركم تخيل وش قلت.....
























قلت ( فيه العافيه) فوالله ان احد الاصدقاء من شدة الضحك رايت الموز يخرج من انفه وكدت ان اغرق في نوبه من البكاء من شدة الخجل ..

[الشدوي]

الزاهر
ياخوي اثاريك اكشر الرجال بغا يموت وانت قاعد تمزح

مره واحد " تراه ماهو انا "

تعرفون التيل " اظن يسمونها في الغربيه برجون "

عاد الصغير قاعد يلعب فيها وجمعها وحطها في جيب الحبيب والطيب ياغافلين لك الله .....
المهم صاحبنا درعم للمسجد يصلي ...
يوم جا يسجد وهي تتفلت التيل من جيبه
عاد رقعها وانت في الصف الاول وحولك شيبان ...

[الزاهر]

الاخ احمد احسنت
تكبر وتا خذ غيرها ( وفيه العافية )
الاخ الشدوي

يرجال عادي حت لوكن انت مسموح
بس كيف كان منظرك وانت تسجد وتلقط البرجون
ههههههه هههههههه

المهم لي صديق
راح السوق يشتري اغراض البيت ومعه ورقة مليانة بالطلبات
المهم يشتري ويحط في السيارة حتى امتلى صندوق الونيت
واخر مشوار رجع لسيارته ولم يجد فيها ولا شي من الاغراض التي اشتراها
تدرون ليش
تعالو اقلكم
؟
؟
؟


؟


؟













الرجال كان يحط الاغراض في سيارة واقفه جنب سيارته
نفس الموديل نفس اللون لا تستطيع التفريق بين السيارتين
الذي اختلف عليه بعد هذا الموقف مكان السيارة
ورجع يشتر اغراض من جديد
والظاهر ان صاحب السيارة ما صدق تجي له كل هذى الاغراض
ولم يرجع

[التهامي]

أما أنا فحصل لي موقف حرمت بعده ادخل حمام مسجد:D

المهم صليت المغرب في أحد المساجد في جدة وبعدما خرجت من الصلاة رجعت لحمام المسجد والظاهر اني طولت فيه المهم يوم خرجت من الحمام لقيت دورة المياه ( الباب الرئيسي ) مقفل حاولت فتحه لكن دون جدوى عاد ايش اسوي انتظرت لأكثر من ساعة إلى أن حان أذان العشاء وياجي ذاك الشايب يفتح دورة المياه ويوم شافني قدامه بغى يغزل:D من شدة الإحراج خرجت من الباب بدون كلام والشايب باقي فاتح فمه من الدهشة وأقول بيني وبين نفسي الحمد لله ان هذا الحبس ماكان بعد صلاة العشاء والأ كان سرى علي ليل وماخرجت إلا في صلاة الفجر

[الزاهر]

مشكور اخي التهامي على المشاركة
ونتمني من الجميع المشاركة

وكان ودي تكون صلاة الصبح والا العشى
لكن معليش يا التهامي
خيرها في غيرها

[ابوتركي]

اما هذا الموقف حصل على غامدي وخبرني بالموقف ولد عمه وهو ثقه ما خبرته يكذب المهم الموقف ان الولد هذا غامدي وطلع مع ابوه واخوه على البحر وهو خجول جدا و حان وقت صلاة المغرب فقال له ابوه يالله نصلي وانت يا فلان صل بنا وبعد الحاح من ابوه تقدم الولد وصلى بهم الركعه الاولى وربك ستر المهم لما قام الركعه الثانيه قرا الفاتحه ولما قال ولا الضالين سمع اللي ردوا عليه كثير وعرف ان فيه ناس مع ابوه واخوه وعندها تلخبط الولد وجلس متلخبط والظاهر ضاعت علوم الرجال وفجاه حدثت الكارثه بدل ما يقرا صوره من القران قرا التحيات لله والصلوات الطيبات وادهر الرجال ويلحن بعد ووقتها ما تسمع الا النحنحه واللي يقول سبحان الله واللي يضحك المهم الولد من شدة الاحراج قطع الصلاه ووينه ووين الجمس وعاد الباقين كملوا الصلاه كيف ما ادري وسلامتكم والى اللقاء في الروايه القادمه وعساكم من عواده

[احمد السريفي]

حلووووووووه يابو تركي وقسم بالله اني قرات هذا الموضوع في المقهى والكل سمع ضحكي.
ازيدك من الشعر بيت


واحد من الشباب الله يوفقه ويستر عليه نفس الطريقه خجول بشكل ماتتصورونه وقت الصلاه لانه ملتحي المسكين وعلى نياته اجبره خويه يصلى بهم المهم صلى وقرا الفاتحه واسمع كلمة امين لها صدى فوق الخيال عرف ان وراة ناس واجد كمل الركع وركع ومن ثم سجد ولما حس ان الكل سجد وراة وينك وين الباب يافكيك دعس حط رجلة ,كيف كملوا الصلاه الله اعلم

[أحمد الصفحي]

ذهبت مع أحد الأصدقا ء نعزّي عند أهل واحد ميّت الله يرحمه وكان العزاء بعدأيام العيد مباشرة وعند جلوسنا في المجلس وقد اكتضّ بالناس لاشعورياً قلت بصوت مرتفع كلّ عام وإنتم بخير ياجماعة . عندها أخذ بعض الناس يتغامزون ويضحكون على استحياء مراعاةً لشعور أهل الميّت . ولكم ياإخوة أن تتخيّلوا كيف كانت حالتي , بس لاتضحكوا عليه أنتم أيضاً ,,,, الله لايرميكم في ضيقة

[بسمة زهران]

اما انا ياشباب فموقفي الله لا يوريه واحد فيكم

عندنا بالشرقيه مجمع نسائي يعني حريم في حريم الوحده هناك تدخل وتفصخ العباة وتاخذ راحتها وهي تتسوق

المهم

رحت مره لهالمجمع وفي هالمجمع محل يبيع حلى وكيك ودنيا
هذا المحل سلمكم الله في الركن ودار ما دار زجاج يعني اللي يشوفه من بعيد ما يدري هو فيه حاجز او لا
واقز لكم من بعييييييييييد كنافه ولا احلى منها
إلا واختكم سعابيلها تجري أنهارا أنهار مشتهيتها
واجيكم طاااااايره من بعيييييد مسرعه مثل الخيل
ودررررربجججججججججج الحاجز كله يهتز
واختكم لزقت بالحاجز وما انفكت منه إلا بالقوه
الحمد لله بس ان الزجاج ما تكسر من قوة الصقعه

المهم
أنا طبعا من الفشله ما حسيت بالالم اللي صك بوجهي ولا بالفلعات اللي طلعت بجبهتي ومشيت ولا كأن شي صار

وطول ما انا امشي افكر بالكنافه .. ما يسوى علي بعد هالصقعه ما اذوقها

والف لكم من الجهه الثانيه
وهالمره جلست اتحسس الحاجز بيدي كاني وحده عميه
خايفه لا أخبط فيه مره ثانيه
ولما وصلت بالسلامه للباب ودخلت المحل
على طووووووول ضحكت اللي قاعده تبيع وقالت : انتي اللي سببتي كل هالزلزال ؟!!
وهي لما قالت كذا .. تعالوا دوروا على اختكم من الفشله
طلعت على طووووول من المحل ومن المجمع كله

بس اتصدقون
بيني وبينكم الى الآن ودي في هذيك الكنافه

[فتى الأحلاف]

اما هذا الموقف حصل على اثنين من الشباب .
نزلوا المخواه يتعشون راحوا مطعم برست تعشوا والي منهم بالخير عطوهم مع البرست كاتشب في اكياس بعد ما خلصوا العشاء اخذوا الكاشب معهم في جيوبهم رجعوا الوادي وصولوا عند البيت طلعوا الكاتشب يحسبونها مناديل معطره (يبغون يدخلون البيت وهم متعطرين) طبعا الوادي ضلام فتحوا الأكياس وكبوا الكاتشب في اياديهم ومسحوا بها وجيههم قال الأول لثاني
(ياخوي كن فيها طعم قوطه )؟؟ ولعوا نور السياره ولا وجوههم ملطخه بالكاتشب . :D :D

[الزاهر]

يعطيكم العافية
والى مزيد من المواقف


زميل لي كان ينتظر صديقه على الرصيف وتعرفون الانتظار
صعب واخذ يمشي على الرصيف ووقف امام جمس ملكي مظلل وقام يزبط الغترة والمرزاب ويطالع في قزاز الجمس العاكس
وشوية مسكة واحد ضخم الجثة عريض المنكبين وقال ما تستحي تعاكس الحريم
كان الجمس فيه عايلة وصاحبنا ما شافهم لان القزاز عاكس
وقام يحلف اني ما عاكست ولا ادري ان الجمس فيه عائلة
المهم صاحب السيارة شاف حال الرجال شكله ماهو شكل واحد يعاكس انسان طيب
وملتحي وتركه وراح يجري وكان موقف لا يحسد عليه

[جار القمر]

موقف طريف

اولا الله يعطيكم العافية غلى هذه المشاركة الفعالة والشكر اولا لصاحب البدء اللاخ الزاهر ...
فيه واحد من الأئمة الشيبان الله يوفقهم جاء يصلي متأخر المهم صلى في المتاخرين اللي معاه شوي الا وجاي واحد متاخر بعد الا وشايبنا ذا يقوله : انجز ترانا قد صلينا ركعه وهو في الصلاة
وشوي الا والمامومين اللي وراه طايحين في ذا الضحك ما بقي منهم حد راحوا وخلوه يصلي لحاله

[الزاهر]

هههههههههههههه
مشكور على المشاركة
اخي جار القمر وانت القمر

تحياتي لك

[جليس القمر]

موقف عصييييييييييييييييييب في حمام ، هههههههه

سالفه صارت لواحد من الشبيبيه ،،،،،
في جده ،،،،، في أيام عيد الأضحى قبل حوالي سنتين ،،،،، الرجال كان مزنووووووووووووق بالمره ، ( حشران) ويحاول فيه من ساعتين أوديه الحمام وإنتم بكرامه ، المهم بعد مجهود بحث حوالي ثلاث ساعات ، ( وتعرفون زحمة جده ، فوق إن ما فيها حمامات) حصلنا مسجد صغير وحماماته مفتوحه ، المهم الرجال ما خلاني أوقف السيارة إلا وأنطلق ،،،،،، وخلى الباب مفتوح ،،، وهنا صار الي ماهو في الحسبان.

الرجال دخل الحمام ،،، وشوي ،،،،،،،،،،، إلا وأشوف لك ثلاث حريم داخلات نفس الحمامات الي دخلها خوينا. في البدايه ،، قلت شكلهم غلطانين وبيرجعون.

ما جاء في بالي إن خويي هوه الغلطان . هههههههههههههه وإنه دخل حمامات النساء.!!!!!!!!!!!!

ويصمخون الثلاث الحريم حوالي ساعه في الحمام ،، وأخوكم منتظر متى يخرج خويه.
بعد ماخرجوا ،،،،،، أروح أصيح لخويي .. يا جمعان ،،، يا جمعان.

هههههههههههه إلا وأسمع صوت شيء أنكسر، شيء طاح ،، أو شيء زي كذا.
وما أشوف إلا وجمعان خارج وثوبه في فمه. وعلى طول على السيارة جري. المهم سألته بعدين وش الي صار جوى. ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

قال : فاتك ،، ما خلوا واحد من الناس ماتكلموا فيه ، ما خلوا وحده من معارفهم ما تكلموا فيها ،، وما خلوا سالفه إلا وسولفوا فيها ،،، وأسأله أنا ،، طيب وإنت ؟؟؟؟؟

قال : أنا ،،،،،،،،، لا تسأل عني ،،،،، والله ما عد أدخل حمام. ههههههههه من الخوف الي جاه.

يقول : أنا في الحمام ، والحمام الي أنا فيه ما يتقفل من جوى ، هههههه، وجالس وماسك الباب بيدي ،، وأدفه لبرى علشان ما أحد يدخل ،، ههههههه لا وأزيدكم من الشعر بيت ، يقول وحده منهم ،، بغت تدخل ،، إلا وحست الباب ثقيل ،،،،، وما قدرت تفتحه. قامت إيش سوت أختنا في الله .؟؟؟؟؟؟؟؟؟؟؟؟؟؟؟؟؟؟؟

قفلت الباب من برى . ههههههههههههههه

والصوت الي سمعته ، قبل ما يخرج خويي ،،،،، كان صوت الباب لما كسره ، علشان يطلع من الحمام. ومن يومها يقول ما راح دورة مياة برى البيت. تصدقون؟؟؟؟؟؟؟

آسف إذا كنت أطلت فيها ،، لكن كان ودي تكونوا معايه في الموقف هذا ،،، علشان تضحكوا صح. وأسأل الله إنه ما يحكم لا في موقفي ولا في موقف خويي جمعان هذا.......

وسلامتكم ، أخوكم : جليــــ القمر ـــــــس.